مجھے آہ و فغانِ نیم شب کا پھر پیام آیا

مجھے آہ و فغانِ نیم شب کا پھر پیام آیا

تھم اے رہرو کہ شاید پھر کوئی مشکل مقام آیا

ذرا تقدیر کی گہرائیوں میں ڈُوب جا تُو بھی

کہ اس جنگاہ سے مَیں بن کے تیغِ بے نیام آیا

یہ مصرع لِکھ دیا کس شوخ نے محرابِ مسجد پر

یہ ناداں گر گئے سجدوں میں جب وقتِ قیام آیا

چل، اے میری غریبی کا تماشا دیکھنے والے

وہ محفل اُٹھ گئی جس دم تو مجھ تک دَورِ جام آیا

دیا اقبالؔ نے ہندی مسلمانوں کو سوز اپنا

یہ اک مردِ تن‌آساں تھا، تن‌آسانوں کے کام آیا

اسی اقبالؔ کی مَیں جُستجو کرتا رہا برسوں

بڑی مُدّت کے بعد آخر وہ شاہیں زیرِ دام آیا

mujhe ah-o-fughan-e-nim shab ka phir payam aya

tham ai rahrau ke shayad phir koi mushkil maqam aya

zara taqdir ki gahraiyon mein dub ja tu bhi

ke is jangah se main ban ke tegh-e-be niyam aya

ye misra likh diya kis shokh ne mehrab-e-masjid par

ye nadan gir gae sajdon mein jab waqt-e-qayam aya

chal, ai meri gharibi ka tamasha dekhne wale

wo mahfil uth gai jis dam to mujh tak daur-e-jam aya

diya iqbal ne hindi musalmanon ko soz apna

ye ik mard-e-tanasan tha, tanasanon ke kam aya

isi iqbal ki main justuju karta raha barson

bari muddat ke baad akhir wo shahin zer-e-dam aya