مجھے اے اہل کعبہ یاد کیا مے خانہ آتا ہے

مجھے اے اہل کعبہ یاد کیا مے خانہ آتا ہے

ادھر دیوانہ جاتا ہے ادھر مستانہ آتا ہے

مری مژگاں سے آنسو پوچھتا ہے کس لئے ناصح

ٹپک پڑتا ہے خود جو اس شجر میں دانہ آتا ہے

یہ آمد ہے کہ آفت ہے نگہ کچھ ہے ادا کچھ ہے

الٰہی خیر مجھ سے آشنا بیگانہ آتا ہے

دم تقریر نالہ حلق میں چھریاں چبھوتے ہیں

زباں تک ٹکڑے ہو ہو کر مرا افسانہ آتا ہے

رخ روشن کے آگے شمع رکھ کر وہ یہ کہتے ہیں

ادھر جاتا ہے دیکھیں یا ادھر پروانہ آتا ہے

جگر تک آتے آتے سو جگہ گرتا ہوا آیا

ترا تیر نظر آتا ہے یا مستانہ آتا ہے

وہی جھگڑا ہے فرقت کا وہی قصہ ہے الفت کا

تجھے اے داغؔ کوئی اور بھی افسانہ آتا ہے

mujhe ai ahl-e-kaaba yad kya mai khana ata hai

idhar diwana jata hai idhar mastana ata hai

miri mizhgan se ansu puchhta hai kis liye naseh

tapak parta hai khud jo is shajar mein dana ata hai

ye amad hai ke afat hai nigah kuchh hai ada kuchh hai

ilahi khair mujh se ashna begana ata hai

dam-e-taqrir nala halq mein chhuriyan chubhote hain

zaban tak tukre ho ho kar mira afsana ata hai

rukh-e-raushan ke age shama rakh kar wo ye kahte hain

idhar jata hai dekhen ya idhar parwana ata hai

jigar tak ate ate so jagah girta hua aya

tira tir-e-nazar ata hai ya mastana ata hai

wahi jhagra hai furqat ka wahi qissa hai ulfat ka

tujhe ai dagh koi aur bhi afsana ata hai