لپٹ لپٹ کے میں اس گل کے ساتھ سوتا تھا

لپٹ لپٹ کے میں اس گل کے ساتھ سوتا تھا

رقیب صبح کو منہ آنسوؤں سے دھوتا تھا

تمام رات تھی اور کہنیاں و لاتیں تھیں

نہ سونے دیتا تھا مجھ کو نہ آپ سوتا تھا

جو بات ہجر کی آتی تو اپنے دامن سے

وہ آنسو پونچھتا جاتا تھا اور میں روتا تھا

مسکتی چولی تو لوگوں سے چھپ کے سینے کو

وہ تاگے بٹتا تھا اور میں سوئی پروتا تھا

غرض دکھانے کو آن و ادا کے سو عالم

وہ مجھ سے پاؤں دھلاتا تھا اور میں دھوتا تھا

لٹا کے سینے پہ چنچل کو پیار سے ہر دم

میں گدگداتا تھا ہنس ہنس وہ ضعف کھوتا تھا

وہ مجھ پہ پھینکتا پانی کی کلیاں بھر بھر

میں اس کے چھینٹوں سے تو پیرہن بھگوتا تھا

نہانے جاتے تو پھر آہ کرتی چھینٹوں سے

وہ غوطے دیتا تھا اور میں اسے ڈبوتا تھا

ہوا نہ مجھ کو خمار آخر ان شرابوں کا

نظیرؔ آہ اسی روز کو میں روتا تھا

lipat lipat ke main us gul ke sath sota tha

raqib subh ko munh ansuon se dhota tha

tamam rat thi aur kahniyan-o-laten thin

na sone deta tha mujh ko na ap sota tha

jo bat hijr ki ati to apne daman se

wo ansu ponchhta jata tha aur main rota tha

masakti choli to logon se chhup ke sine ko

wo tage batta tha aur main soi pirota tha

gharaz dikhane ko an-o-ada ke so alam

wo mujh se paon dhulata tha aur main dhota tha

luta ke sine pe chanchal ko pyar se har dam

main gudgudata tha hans hans wo zof khota tha

wo mujh pe phenkta pani ki kaliyan bhar bhar

main us ke chhinton se to pairahan bhigota tha

nahane jate to phir ah karti chhinton se

wo ghaute deta tha aur main use dubota tha

hawa na mujh ko khumar akhir in sharabon ka

nazir ah usi roz ko main rota tha