لطافت بے کثافت جلوہ پیدا کر نہیں سکتی

لطافت بے کثافت جلوہ پیدا کر نہیں سکتی

چمن زنگار ہے آئینۂ باد بہاری کا

حریف جوشش دریا نہیں خودداری ساحل

جہاں ساقی ہو تو باطل ہے دعویٰ ہوشیاری کا

بہار رنگ خون گل ہے ساماں اشک باری کا

جنون برق نشتر ہے رگ ابر بہاری کا

برائے حل مشکل ہوں ز پا افتادۂ حسرت

بندھا ہے عقدۂ خاطر سے پیماں خاکساری کا

بہ وقت سرنگونی ہے تصور انتظارستاں

نگہ کو آبلوں سے شغل ہے اختر شماری کا

اسدؔ ساغر کش تسلیم ہو گردش سے گردوں کی

کہ ننگ فہم مستاں ہے گلہ بد روزگاری کا

latafat be kasafat jalwa paida kar nahin sakti

chaman zangar hai aina-e-bad-e-bahari ka

harif-e-joshish-e-dariya nahin khuddari-e-sahil

jahan saqi ho to batil hai daawa hoshyari ka

bahar-e-rang-e-khun-e-gul hai saman ashk bari ka

junun-e-barq nashtar hai rag-e-abr-e-bahari ka

bara-e-hal-e-mushkil hun ze pa uftada-e-hasrat

bandha hai uqda-e-khatir se paiman khaksari ka

ba waqt-e-surangwani hai tasawwur intizarsitan

nigah ko ablon se shaghl hai akhtar shumari ka

asad saghar kash-e-taslim ho gardish se gardun ki

ke nang-e-fahm-e-mustan hai gila bad rozgari ka