غیر ہو ناشاد کیوں کیسی کہی

غیر ہو ناشاد کیوں کیسی کہی

چاہتا ہوں داد کیوں کیسی کہی

پہلے گالی دی سوال وصل پر

پھر ہوا ارشاد کیوں کیسی کہی

تم نے دل کی بات کیوں کیسی سنی

ہم نے یہ روداد کیوں کیسی کہی

مانگتے تھے میرے ملنے کی دعا

وہ بھی دن ہیں یاد کیوں کیسی کہی

تو بھی اے ناصح کسی پر جان دے

ہاتھ لا استاد کیوں کیسی کہی

داغؔ تجھ کو باغ جنت ہو نصیب

خانماں برباد کیوں کیسی کہی

ghair ho nashad kyun kaisi kahi

chahta hun dad kyun kaisi kahi

pahle gali di sawal-e-wasl par

phir hua irshad kyun kaisi kahi

tum ne dil ki bat kyun kaisi suni

ham ne ye rudad kyun kaisi kahi

mangte the mere milne ki dua

wo bhi din hain yad kyun kaisi kahi

tu bhi ai naseh kisi par jan de

hath la ustad kyun kaisi kahi

dagh tujh ko bagh-e-jannat ho nasib

khanuman barbad kyun kaisi kahi