برسات (برج نرائن چکبست, II)

ہے دلاتی یاد مے نوشی فضا برسات کی

دل بڑھا جاتی ہے آ آ کر گھٹا برسات کی

بندھ گئی ہے رحمت حق سے ہوا برسات کی

نام کھلنے کا نہیں لیتی گھٹا برسات کی

اگ رہا ہے ہر طرف سبزہ در و دیوار پر

انتہا گرمی کی ہے اور ابتدا برسات کی

دیکھنا سوکھی ہوئی شاخوں میں بھی جان آ گئی

حق میں پودوں کے مسیحا ہے ہوا برسات کی

ہوں شریک بزم مے زاہد بھی توبہ توڑ کر

جھومتی قبلہ سے اٹھی ہے گھٹا برسات کی

اصل تو یہ ہے مے و معشوق کا جب لطف ہے

چاندنی ہو رات کو دن کو گھٹا برسات کی

وہ پپیہوں کی صدائیں اور وہ موروں کا رقص

وہ ہوائے سرو اور کالی گھٹا برسات کی

پار اتر جائیں گے بحر غم سے رند بادہ نوش

لے اڑے گی کشتیٔ مے کو ہوا برسات کی

خود بخود تازہ امنگیں جوش پر آنے لگیں

دل کو گرمانے لگی ٹھنڈی ہوا برسات کی

وہ دعائیں مے کشوں کی اور وہ لطف انتظار

ہائے کن نازوں سے چلتی ہے ہوا برسات کی

میں یہ سمجھا ابر کے رنگین ٹکڑے دیکھ کر

تخت پریوں کے اڑ لائی ہوا برسات کی

ناز ہو جس کو بہار مصر و شام و روم پر

سر زمین ہند میں دیکھے فضا برسات کی

hai dilati yad mai noshi faza barsat ki

dil barha jati hai a a kar ghata barsat ki

bandh gai hai rahmat-e-haq se hua barsat ki

nam khulne ka nahin leti ghata barsat ki

ug raha hai har taraf sabza dar-o-diwar par

intiha garmi ki hai aur ibtida barsat ki

dekhna sukhi hui shakhon mein bhi jan a gai

haq mein paudon ke masiha hai hawa barsat ki

hun sharik-e-bazm-e-mai zahid bhi tauba tor kar

jhumti qibla se uthi hai ghata barsat ki

asl to ye hai mai-o-maashuq ka jab lutf hai

chandni ho rat ko din ko ghata barsat ki

wo papihon ki sadaen aur wo moron ka raqs

wo hawa-e-sarw aur kali ghata barsat ki

par utar jaenge bahr-e-gham se rind-e-bada nosh

le uregi kashti-e-mai ko hua barsat ki

khud bakhud taza umangen josh par ane lagen

dil ko garmane lagi thandi hua barsat ki

wo duaen mai kashon ki aur wo lutf-e-intizar

hae kin nazon se chalti hai hawa barsat ki

main ye samjha abr ke rangin tukre dekh kar

takht pariyon ke ur lai hua barsat ki

naz ho jis ko bahar-e-misr-o-sham-o-rom par

sar zamin-e-hind mein dekhe faza barsat ki