غم فراق مے و جام کا خیال آیا

غم فراق مے و جام کا خیال آیا

سفید بال لیے سر پہ اک وبال آیا

ملے گا غیر بھی ان کے گلے بہ شوق اے دل

حلال کرنے مجھے عید کا ہلال آیا

اگر ہے دیدۂ روشن تو آفتاب کو دیکھ

ادھر عروج ہوا اور ادھر زوال آیا

لٹائے دیتے ہیں ان موتیوں کو دیدۂ شوق

بھر آئے اشک کہ مفلس کے ہاتھ مال آیا

لگی نسیم بہاری جو معرفت گانے

گلوں پہ کچھ نہیں موقوف سب کو حال آیا

پیام بر کو عبث دے کے خط ادھر بھیجا

غریب اور وہاں سے شکستہ حال آیا

خدا خدا کرو اے شادؔ اس پہ نخوت کیا

جو شاعری تمہیں آئی تو کیا کمال آیا

gham-e-firaq-e-mai-o-jam ka khayal aya

safed bal liye sar pe ik wabal aya

milega ghair bhi un ke gale ba shauq ai dil

halal karne mujhe eid ka hilal aya

agar hai dida-e-raushan to aftab ko dekh

idhar uruj hua aur idhar zawal aya

lutae dete hain in motiyon ko dida-e-shauq

bhar ae ashk ke muflis ke hath mal aya

lagi nasim-e-bahari jo maarifat gane

gulon pe kuchh nahin mauquf sab ko hal aya

payam bar ko abas de ke khat idhar bheja

gharib aur wahan se shikasta hal aya

khuda khuda karo ai shad us pe nakhwat kya

jo shayari tumhen ai to kya kamal aya