غربت کے رنج فاقہ کشی کے ملال کھینچ

غربت کے رنج فاقہ کشی کے ملال کھینچ

اے داغؔ پر زمانے سے دست سوال کھینچ

نازک بہت ہے رشتہ الفت نہ ٹوٹ جائے

اتنا نہ اپنے آپ کو اے مہ جمال کھینچ

ہو جائے تو نہ طائر دل کی طرح اسیر

صیاد اپنی سمت کو آہستہ جال کھینچ

کھینچی تھی جب مصور قدرت نے دل کی شکل

کہتا یہ کون تو نہ اسے بے خیال کھینچ

وہ ٹھنڈے ٹھنڈے چین سے گھر کو چلے گئے

لے اور آہ سرد دل پر ملال کھینچ

ناصح قمار گاہ محبت میں جی نہ ہار

دل کو لگا کے نفع اٹھا خوب مال کھینچ

اے داغؔ جذب عشق کی دیکھیں گے اب کشش

کی اس کشیدہ رو نے تو ہم سے کمال کھینچ

ghurbat ke ranj faqa kashi ke malal khinch

ai dagh par zamane se dast-e-sawal khinch

nazuk bahut hai rishta ulfat na tut jae

itna na apne ap ko ai mah jamal khinch

ho jae to na tair-e-dil ki tarah asir

sayyad apni samt ko ahista jal khinch

khinchi thi jab musawwir-e-qudrat ne dil ki shakl

kahta ye kaun to na use be khayal khinch

wo thande thande chain se ghar ko chale gae

le aur ah-e-sard dil pur malal khinch

naseh qimar gah-e-mohabbat mein ji na har

dil ko laga ke nafa utha khub mal khinch

ai dagh jazb-e-ishq ki dekhenge ab kashish

ki is kashida ro ne to ham se kamal khinch