غریب آدمی کو ٹھاٹ پادشاہی کا

غریب آدمی کو ٹھاٹ پادشاہی کا

یہ پیش خیمہ ہے ظالم تری تباہی کا

خدنگ آہ کو روکے رہا ہوں فرقت میں

خیال ہے مجھے افلاک کی تباہی کا

امید کیسے ہو محشر میں سرخ روئی کی

ہمیشہ کام کیا ہو جو رو سیاہی کا

سلام تک نہیں لیتے کلام تو کیسا

فقیری میں بھی تبختر ہے بادشاہی کا

شکست و فتح کا ذمہ نہیں دل ناداں

لڑے ہزار میں یہ کام ہے سپاہی کا

خضاب کرتے ہیں دنیا سے جب گئے گزرے

شگون کرتے ہیں پیری میں رو سیاہی کا

نہ آسماں کی عنایت نہ مہرباں وہ شوخ

نہ پوچھو حال غریبوں کی بے پناہی کا

سفید بالوں پہ کس واسطے خضاب لگائیں

گیا زمانہ جوانی میں رو سیاہی کا

خطائیں ہو گئیں معدوم حج سے اے پرویںؔ

گواہ خود ہے خدا میری بے گناہی کا

gharib admi ko that padshahi ka

ye pesh-e-khema hai zalim tiri tabahi ka

khadang ah ko roke raha hun furqat mein

khayal hai mujhe aflak ki tabahi ka

umid kaise ho mahshar mein surkh roi ki

hamesha kam kya ho jo ro siyahi ka

salam tak nahin lete kalam to kaisa

faqiri mein bhi tabakhtur hai badshahi ka

shikast-o-fath ka zimma nahin dil-e-nadan

lare hazar mein ye kam hai sipahi ka

khizab karte hain duniya se jab gae guzre

shugun karte hain piri mein ro siyahi ka

na asman ki inayat na mehrban wo shokh

na puchho hal gharibon ki be panahi ka

safed balon pe kis waste khizab lagaen

gaya zamana jawani mein ro siyahi ka

khataen ho gain maadum haj se ai parwin

gawah khud hai khuda meri be gunahi ka