دلِ مردہ دل نہیں ہے، اسے زندہ کر دوبارہ

دلِ مردہ دل نہیں ہے، اسے زندہ کر دوبارہ

کہ یہی ہے اُمّتوں کے مَرضِ کُہن کا چارہ

ترا بحر پُر سکُوں ہے، یہ سکُوں ہے یا فسُوں ہے؟

نہ نَہنگ ہے، نہ طُوفاں، نہ خرابیِ کنارہ!

تُو ضمیرِ آسماں سے ابھی آشنا نہیں ہے

نہیں بے قرار کرتا تجھے غمزۂ ستارہ

ترے نیستاں میں ڈالا مرے نغمۂ سحَر نے

مری خاکِ پے سِپَر میں جو نِہاں تھا اک شرارہ

نظر آئے گا اُسی کو یہ جہانِ دوش و فردا

جسے آگئی میّسر مری شوخیِ نظارہ

dil-e-murda dil nahin hai, use zinda kar dobara

ke yahi hai ummaton ke maraz-e-kuhan ka chara

tira bahr pur sukun hai, ye sukun hai ya fusun hai?

na nahang hai, na tufan, na kharabi-e-kinara!

tu zamir-e-asman se abhi ashna nahin hai

nahin be qarar karta tujhe ghamza-e-sitara

tire nayastan mein dala mire naghma-e-sahar ne

miri khak-e-pe sipar mein jo nihan tha ik sharara

nazar aega usi ko ye jahan-e-dosh-o-farda

jise agi muyassar miri shokhi-e-nazara