بجھا سا رہتا ہے دل جب سے ہیں وطن سے جدا

بجھا سا رہتا ہے دل جب سے ہیں وطن سے جدا

وہ صحن باغ نہیں سیر ماہتاب نہیں

بسے ہوئے ہیں نگاہوں میں وہ حسیں کوچے

ہر ایک ذرہ جہاں کم ز آفتاب نہیں

وہ باغ و راغ کے دلچسپ و دل نشیں منظر

کہ جن کے ہوتے ہوئے خلد مثل خواب نہیں

وہ جوئبار رواں کا طرب فزا پانی

شراب سے نہیں کچھ کم اگر شراب نہیں

برنگ زلف پریشاں وہ موج ہائے رواں

کہ جن کی یاد میں راتوں کو فکر خواب نہیں

سما رہے ہیں نظر میں وہ مہوشان حرم

حرم میں جن کے ستارے بھی باریاب نہیں

وطن کا چھیڑ دیا کس نے تذکرہ اخترؔ

کہ چشم شوق کو پھر آرزوئے خواب نہیں

bujha sa rahta hai dil jab se hain watan se juda

wo sehn-e-bagh nahin sair-e-mahtab nahin

base hue hain nigahon mein wo hasin kuche

har ek zarra jahan kam ze aftab nahin

wo bagh-o-ragh ke dilchasp-o-dil nashin manzar

ke jin ke hote hue khuld misl-e-khwab nahin

wo joibar rawan ka tarab faza pani

sharab se nahin kuchh kam agar sharab nahin

barang-e-zulf-e-pareshan wo mauj ha-e-rawan

ke jin ki yad mein raton ko fikr khwab nahin

sama rahe hain nazar mein wo mahwashan haram

haram mein jin ke sitare bhi baryab nahin

watan ka chher diya kis ne tazkira akhtar

ke chashm-e-shauq ko phir arzu-e-khwab nahin