شیکسپیر

شفَقِ صبح کو دریا کا خرام آئینہ

نغمۂ شام کو خاموشیِ شام آئینہ

برگِ گُل آئنۂ عارضِ زیبائے بہار

شاہدِ مے کے لیے حجلۂ جام آئینہ

حُسن آئینۂ حق اور دل آئینۂ حُسن

دلِ انساں کو ترا حُسنِ کلام آئینہ

ہے ترے فکرِ فلک رس سے کمالِ ہستی

کیا تری فطرتِ روشن تھی مآلِ ہستی

تجھ کو جب دیدۂ دیدار طلب نے ڈھُونڈا

تابِ خورشید میں خورشید کو پنہاں دیکھا

چشمِ عالَم سے تو ہستی رہی مستور تری

اور عالَم کو تری آنکھ نے عُریاں دیکھا

حِفظِ اسرار کا فطرت کو ہے سودا ایسا

رازداں پھر نہ کرے گی کوئی پیدا ایسا

shafaq-e-subh ko dariya ka khiram aina

naghma-e-sham ko khamoshi-e-sham aina

barg-e-gul aina-e-ariz-e-zeba-e-bahar

shahid-e-mai ke liye hajla-e-jam aina

husn aina-e-haq aur dil-e-aina-e-husn

dil-e-insan ko tira husn-e-kalam aina

hai tire fikr-e-falak ras se kamal-e-hasti

kya tiri fitrat-e-raushan thi maal-e-hasti

tujh ko jab dida-e-didar talab ne dhunda

tab-e-khurshid mein khurshid ko pinhan dekha

chashm-e-alam se to hasti rahi mastur tiri

aur alam ko tiri ankh ne uryan dekha

hifz-e-asrar ka fitrat ko hai sauda aisa

razdan phir na karegi koi paida aisa