عاشق کی بھی کٹتی ہیں کیا خوب طرح راتیں

عاشق کی بھی کٹتی ہیں کیا خوب طرح راتیں

دو چار گھڑی رونا دو چار گھڑی باتیں

قرباں ہوں مجھے جس دم یاد آتی ہیں وہ باتیں

کیا دن وہ مبارک تھے کیا خوب تھیں وہ راتیں

اوروں سے چھٹے دل بر دل دار ہووے میرا

برحق ہیں اگر پیرو کچھ تم میں کراماتیں

کل لڑ گئیں کوچے میں آنکھوں سے مری آنکھیاں

کچھ زور ہی آپس میں دو دو ہوئیں سمگھاتیں

کشمیر سی جاگہ میں نا شکر نہ رہ زاہد

جنت میں تو اے گیدی مارے ہے یہ کیوں لاتیں

اس عشق کے کوچے میں زاہد تو سنبھل چلنا

کچھ پیش نہ جاویں گی یاں تیری مناجاتیں

اس روز میاں مل کر نظروں کو چراتے تھے

تجھ یاد میں ہی ساجن کرتے ہیں مداراتیں

سوداؔ کو اگر پوچھو احوال ہے یہ اس کا

دو چار گھڑی رونا دو چار گھڑی باتیں

ashiq ki bhi katti hain kya khub tarah raten

do char ghari rona do char ghari baten

qurban hun mujhe jis dam yad ati hain wo baten

kya din wo mubarak the kya khub thin wo raten

auron se chhute dil bar dil dar howe mera

barhaq hain agar pairo kuchh tum mein karamaten

kal lar gain kuche mein ankhon se miri ankhiyan

kuchh zor hi apas mein do do huin samghaten

kashmir si jagah mein na shukr na rah zahid

jannat mein to ai gidi mare hai ye kyun laten

is ishq ke kuche mein zahid to sambhal chalna

kuchh pesh na jawengi yan teri munajaten

us roz miyan mil kar nazron ko churate the

tujh yad mein hi sajan karte hain madaraten

sauda ko agar puchho ahwal hai ye us ka

do char ghari rona do char ghari baten