شب کو تم ہم سے خفا ہو کر سحر کو اٹھ گئے

شب کو تم ہم سے خفا ہو کر سحر کو اٹھ گئے

شمع ساں رو رو کے ہم بھی دل جگر کو اٹھ گئے

تھے ابھی تو پاس ہی اپنے قرار و ہوش و صبر

تیرے آتے ہی نہ جانے وہ کدھر کو اٹھ گئے

تو نہ نکلا گھر سے باہر صبح سے لے شام تک

دیکھ دیکھ آخر ترے دیوار و در کو اٹھ گئے

کس سے پوچھوں حال میں باشندگان دل کا ہائے

اس نگر کے رہنے والے کس نگر کو اٹھ گئے

اے خوشا وے جو کہ وارستہ تعلق سے ہوئے

جس جگہ چاہا رہے چاہا جدھر کو اٹھ گئے

دیر و کعبہ ہی کو جانا کچھ نہیں لازم غرض

جس طرف پائی خبر اس کی ادھر کو اٹھ گئے

شہر میں رونے کے ہاتھوں جب نہ رہنے پائے ہم

کوہ و صحرا کی طرف لے چشم تر کو اٹھ گئے

پوچھتا ہے حال کیا آوارگان ہند کا

کچھ ادھر کو اٹھ گئے اور کچھ ادھر کو اٹھ گئے

تو اکیلا اس جگہ بیٹھا کرے گا کیا حسنؔ

تیرے ساتھی تو کبھی کے اپنے گھر کو اٹھ گئے

shab ko tum ham se khafa ho kar sahar ko uth gae

shama san ro ro ke ham bhi dil jigar ko uth gae

the abhi to pas hi apne qarar-o-hosh-o-sabr

tere ate hi na jane wo kidhar ko uth gae

tu na nikla ghar se bahar subh se le sham tak

dekh dekh akhir tire diwar-o-dar ko uth gae

kis se puchhun hal mein bashnadgan dil ka hae

is nagar ke rahne wale kis nagar ko uth gae

ai khusha we jo ke warasta taalluq se hue

jis jagah chaha rahe chaha jidhar ko uth gae

dair-o-kaaba hi ko jana kuchh nahin lazim gharaz

jis taraf pai khabar us ki idhar ko uth gae

shahr mein rone ke hathon jab na rahne pae ham

koh-o-sahra ki taraf le chashm-e-tar ko uth gae

puchhta hai hal kya awargan-e-hind ka

kuchh idhar ko uth gae aur kuchh idhar ko uth gae

tu akela is jagah baitha karega kya husn

tere sathi to kabhi ke apne ghar ko uth gae