شب خمارِ شوقِ ساقی رستخیز اندازہ تھا

شب خمارِ شوقِ ساقی رستخیز اندازہ تھا

تا محیطِ بادہ صورت خانۂ خمیازہ تھا

یک قدم وحشت سے درسِ دفتر امکاں کھلا

جادہ، اجزائے دو عالم دشت کا شیرازہ تھا

مانعِ وحشت خرامی ہائے لیلےٰ کون ہے؟

خانۂ مجنونِ صحرا گرد بے دروازہ تھا

پوچھ مت رسوائیِ اندازِ استغنائے حسن

دست مرہونِ حنا، رخسار رہنِ غازہ تھا

نالۂ دل نے دیئے اوراقِ لختِ دل بہ باد

یادگارِ نالہ اک دیوانِ بے شیرازہ تھا

ہوں چراغانِ ہوس جوں کاغذِ آتش زدہ

داغ گرمِ کوششِ ایجادِ داغِ تازہ تھا

بے نوائی تر صدائے نغمۂ شہرت اسدؔ

بوریا یک نیستاں عالم بلند دروازہ تھا

shab khumar-e-shauq-e-saqi rustkhez andaza tha

ta muhit-e-bada surat khana-e-khamyaza tha

yak qadam wahshat se dars-e-daftar-e-imkan khula

jada, ajzae do alam dasht ka shiraza tha

mane-e-wahshat khirami hae lailae kaun hai?

khana-e-majnun-e-sahra gard be darwaza tha

puchh mat ruswai-e-andaz-e-istighna-e-husn

dast marhun-e-hina, rukhsar rahan-e-ghaza tha

nala-e-dil ne diye auraq-e-lakht-e-dil ba bad

yadgar-e-nala ik diwan-e-be shiraza tha

hun charaghan-e-hawas jun kaghaz-e-atish zada

dagh garm-e-koshish-e-ijad-e-dagh-e-taza tha

be nawai tar sada-e-naghma-e-shohrat asad

boriya yak nayastan alam buland darwaza tha