زرگر و حداد خوش ہوں وہ کریں تدبیر ہم

زرگر و حداد خوش ہوں وہ کریں تدبیر ہم

طوق زر تم پہنو پہنیں آہنی زنجیر ہم

اور دیوانوں سے رکھتے ہیں ذرا توقیر ہم

ڈالتے ہیں آپ اپنے پاؤں میں زنجیر ہم

کفر و دیں کے قاعدے دونوں ادا ہو جائیں گے

ذبح وہ کافر کرے منہ سے کہیں تکبیر ہم

یوں ہی خوش کرتے ہیں دل اپنا امید وصل میں

کھینچتے ہیں ایک جا اپنی تری تصویر ہم

آ گیا جس دن خیال جوشش دیوانگی

چاک کر ڈالیں گے اپنا نامۂ تقدیر ہم

سن تو او ظالم بھلا یہ بھی کوئی انصاف ہے

لائق الطاف اعدا قابل تعزیر ہم

وصل میرے ان کے ہوگا کچھ اب اس میں شک نہیں

کہہ دو آمیں دے چکے اس خواب کی تعبیر ہم

روز کا جھگڑا اٹھائے کون کر لیتے ہیں آج

امتحان کاوش قاتل تہ شمشیر ہم

کیوں نہ مستغنی رہیں فضل خدا سے اے نسیمؔ

رکھتے ہیں ملک سخن کی واقعی جاگیر ہم

zargar-o-haddad khush hun wo karen tadbir ham

tauq-e-zar tum pahno pahnen ahani zanjir ham

aur diwanon se rakhte hain zara tauqir ham

dalte hain ap apne paon mein zanjir ham

kufr-o-din ke qaide donon ada ho jaenge

zabh wo kafir kare munh se kahin takbir ham

yun hi khush karte hain dil apna ummid-e-wasl mein

khinchte hain ek ja apni tiri taswir ham

a gaya jis din khayal joshish diwangi

chak kar dalenge apna nama-e-taqdir ham

sun to o zalim bhala ye bhi koi insaf hai

laiq-e-altaf-e-aada qabil-e-taazir ham

wasl mere un ke hoga kuchh ab is mein shak nahin

kah do amanen de chuke is khwab ki taabir ham

roz ka jhagra uthae kaun kar lete hain aj

imtihan-e-kawish-e-qatil tah-e-shamshir ham

kyun na mustaghni rahen fazl-e-khuda se ai nasim

rakhte hain mulk-e-sukhan ki waqai jagir ham