زلف جو رخ پر ترے اے مہر طلعت کھل گئی

زلف جو رخ پر ترے اے مہر طلعت کھل گئی

ہم کو اپنی تیرہ روزی کی حقیقت کھل گئی

کیا تماشا ہے رگ لیلیٰ میں ڈوبا نیشتر

فصد مجنوں باعث جوش محبت کھل گئی

دل کا سودا اک نگہ پر ہے تری ٹھہرا ہوا

نرخ تو کیا پوچھتا ہے اب تو قیمت کھل گئی

آئینے کو ناز تھا کیا اپنے روئے صاف پر

آنکھ ہی پر دیکھتے ہی تیری صورت کھل گئی

تھی اسیران قفس کو آرزو پرواز کی

کھل گئی کھڑکی قفس کی کیا کہ قسمت کھل گئی

تیرے عارض پر ہوا آخر غبار خط نمود

کھل گئی آئینہ رو دل کی کدورت کھل گئی

بے تکلف آئے تم کھولے ہوئے بند قبا

اب گرہ دل کی ہمارے فی الحقیقت کھل گئی

باندھی زاہد نے توکل پر کمر سو بار چست

لیکن آخر باعث سستی ہمت کھل گئی

کھلتے کھلتے رک گئے وہ ان کو تو نے اے ظفرؔ

سچ کہو کس آنکھ سے دیکھا کہ چاہت کھل گئی

zulf jo rukh par tire ai mehr talat khul gai

ham ko apni tira rozi ki haqiqat khul gai

kya tamasha hai rag-e-laila mein duba neshtar

fasd-e-majnun bais-e-josh-e-mohabbat khul gai

dil ka sauda ik nigah par hai tiri thahra hua

nirkh to kya puchhta hai ab to qimat khul gai

aine ko naz tha kya apne ru-e-saf par

ankh hi par dekhte hi teri surat khul gai

thi asiran-e-qafas ko arzu parwaz ki

khul gai khirki qafas ki kya ke qismat khul gai

tere ariz par hua akhir ghubar-e-khat numud

khul gai aina ru dil ki kudurat khul gai

be takalluf ae tum khole hue band-e-qaba

ab girah-e-dil ki hamare fi alhaqiqat khul gai

bandhi zahid ne tawakkul par kamar sau bar chust

lekin akhir bais-e-sasti himmat khul gai

khulte khulte ruk gae wo un ko tu ne ai zafar

sach kaho kis ankh se dekha ke chahat khul gai