زلف کو تھا خیال بوسے کا

زلف کو تھا خیال بوسے کا

خط نے لکھا سوال بوسے کا

دوہرے پتوں کے زیر سایہ ہوا

سب قلم بند حال بوسے کا

چشمک خال رخ نے صاف کہا

ہے تبسم مآل بوسے کا

سبزۂ نو دمیدہ نے مارا

گرد رخسار جال بوسے کا

رہ گیا تیرے مکھڑے پر باقی

اب مکاں خال خال بوسے کا

ہو غضب اپنے بال نوچ لیے

ہے یہ سارا وبال بوسے کا

تیرے غصے سے اب کوئی انشاؔ

چھوڑتا ہے خیال بوسے کا

zulf ko tha khayal bose ka

khat ne likha sawal bose ka

dohre patton ke zer-e-saya hua

sab qalam band hal bose ka

chashmak-e-khal-e-rukh ne saf kaha

hai tabassum maal bose ka

sabza-e-nau damida ne mara

gard rukhsar jal bose ka

rah gaya tere mukhre par baqi

ab makan khal khal bose ka

ho ghazab apne bal noch liye

hai ye sara wabal bose ka

tere ghusse se ab koi insha

chhorta hai khayal bose ka