زبان درگور

صبا اس سے یہ کہہ جو اس طرف ہو کر گزرتا ہو

قدم او جانے والے روک میرا حال سنتا جا

کبھی میں بھی جواں تھا میں بھی حسن و علم رکھتا تھا

وہی میں ہوں مجھے اب دیکھ اگر چشم تماشا ہو

جوانی کی امنگیں شوق علمی ذہن و طباعی

ذکاوت حوصلہ حلم و مروت رحم و غم خواری

خیال اقربا احباب کے عیبوں کی ستاری

قناعت دوست مجھ سے دور کوسوں بغض و طماعی

غرض ایسی بہت سی خوبیاں تھیں موت نے لیکن

بنا ڈالا مرے آتش کدے کو خاک کا تودا

شراروں کے عوض اب بہہ رہا ہے برف کا دریا

مسافر غور سے سن گور سے بچنا ہے نا ممکن

saba us se ye kah jo is taraf ho kar guzarta ho

qadam o jane wale rok mera hal sunta ja

kabhi main bhi jawan tha main bhi husn-o-ilm rakhta tha

wahi main hun mujhe ab dekh agar chashm-e-tamasha ho

jawani ki umangen shauq ilmi zehn-o-tabbai

zakawat hausla halam-o-murawwat rahm-o-gham khwari

khayal aqriba ahbab ke aibon ki sitari

qanaat dost mujh se dur koson bughz-o-tammai

gharaz aisi bahut si khubiyan thin maut ne lekin

bana dala mire atish kade ko khak ka toda

shararon ke ewaz ab bah raha hai barf ka dariya

musafir ghaur se sun gor se bachna hai na mumkin