زاہدو روضۂ رضواں سے کہو عشق اللہ — نظیر اکبر آبادی (Nazeer Akbarabadi)

زاہدو روضۂ رضواں سے کہو عشق اللہ

عاشقو کوچۂ جاناں سے کہو عشق اللہ

جس کی آنکھوں نے کیا بزم دو عالم کو خراب

کوئی اس فتنۂ دوراں سے کہو عشق اللہ

یارو دیکھو جو کہیں اس گل خنداں کا جمال

تو مرے دیدۂ گریاں سے کہو عشق اللہ

ہیں جو وہ کشتۂ شمشیر نگاہ قاتل

جا کے ان گنج شہیداں سے کہو عشق اللہ

آہ کے ساتھ مرے سینے سے نکلے ہے دھواں

اے بتاں مجھ دل بریاں سے کہو عشق اللہ

یاد میں اس کے رخ و زلف کی ہر آن نظیرؔ

روز و شب سنبل و ریحاں سے کہو عشق اللہ