Arooz is now on the App Store, for iPhone and iPad. Download →

All poetry

رہتا تو ہے اس بزم میں چرچا مرے دل کا

Zaheer Dehlvi (1835–1911)

رہتا تو ہے اس بزم میں چرچا مرے دل کا

اچھا ہے یہ اچھا ہو نہ سودا مرے دل کا

ہے جوش قلق معرکہ آرا مرے دل کا

ہنگامہ ہے دل پر مرے برپا مرے دل کا

ہے سیر نگاہوں میں شبستان عدو کی

کیا مجھ سے چھپاتے ہو تماشا مرے دل کا

اک مشغلہ ٹھہری ہے تمہیں رنجش بے جا

اک کھیل ہوا تم کو ستانا مرے دل کا

بے خود ہوں تصور میں کسی برق ادا کے

سرمایۂ تسکیں ہے تڑپنا مرے دل کا

برباد نہ جائے گی ظہیرؔ اپنی مصیبت

آخر تو کہیں صبر پڑے گا مرے دل کا