ریاضؔ اک چلبلا سا دل ہو ہم ہوں — ریاض خیرآبادی (Riyaz Khairabadi)

ریاضؔ اک چلبلا سا دل ہو ہم ہوں

حسینوں کی بھری محفل ہو ہم ہوں

کہا لیلیٰ سے کس نے دل ہو تو ہو

کبھی تو ہو ترا محمل ہو ہم ہوں

مزا دے جائے ہم کو خواب غفلت

مزا آ آئے تم غافل ہو ہم ہوں

ذرا ہم بھی سنیں تم نے کہا کیا

عدو سے جب سر محفل ہو ہم ہوں

لئے حلقے میں ہوں سب اہل محشر

کمر میں ہاتھ ہو قاتل ہو ہم ہوں

بنے تل آنکھ کا گھٹ کر شب وصل

ہماری آنکھ میں یہ تل ہو ہم ہوں

تری الٹی چھری دل میں اتر جائے

عدو جب اس طرح بسمل ہو ہم ہوں

یہ تھک کر بیٹھنا ہو وجہ آرام

مزا ہے سختیٔ منزل ہو ہم ہوں

نہ خلوت چاہئے ہم کو نہ معشوق

ریاضؔ اک آرزوئے دل ہو ہم ہوں