زاہد نہ کہہ بری کہ یہ مستانے آدمی ہیں

زاہد نہ کہہ بری کہ یہ مستانے آدمی ہیں

تجھ کو لپٹ پڑیں گے دیوانے آدمی ہیں

غیروں کی دوستی پر کیوں اعتبار کیجے

یہ دشمنی کریں گے بیگانے آدمی ہیں

جو آدمی پہ گزری وہ اک سوا تمہارے

کیا جی لگا کے سنتے افسانے آدمی ہیں

کیا جرأتیں جو ہم کو درباں تمہارا ٹوکے

کہہ دو کہ یہ تو جانے پہچانے آدمی ہیں

مے بوند بھر پلا کر کیا ہنس رہا ہے ساقی

بھر بھر کے پیتے آخر پیمانے آدمی ہیں

تم نے ہمارے دل میں گھر کر لیا تو کیا ہے

آباد کرتے آخر ویرانے آدمی ہیں

ناصح سے کوئی کہہ دے کیجے کلام ایسا

حضرت کو تا کہ کوئی یہ جانے آدمی ہیں

جب داور قیامت پوچھے گا تم پہ رکھ کر

کہہ دیں گے صاف ہم تو بیگانے آدمی ہیں

میں وہ بشر کہ مجھ سے ہر آدمی کو نفرت

تم شمع وہ کہ تم پر پروانے آدمی ہیں

محفل بھری ہوئی ہے سودائیوں سے اس کی

اس غیرت پری پر دیوانے آدمی ہیں

شاباش داغؔ تجھ کو کیا تیغ عشق کھائی

جی کرتے ہیں وہی جو مردانے آدمی ہیں

zahid na kah buri ke ye mastane admi hain

tujh ko lipat parenge diwane admi hain

ghairon ki dosti par kyun etibar kije

ye dushmani karenge begane admi hain

jo admi pe guzri wo ik siwa tumhare

kya ji laga ke sunte afsane admi hain

kya juraten jo ham ko darban tumhara toke

kah do ke ye to jane pahchane admi hain

mai bund bhar pila kar kya hans raha hai saqi

bhar bhar ke pite akhir paimane admi hain

tum ne hamare dil mein ghar kar liya to kya hai

abad karte akhir wirane admi hain

naseh se koi kah de kije kalam aisa

hazrat ko ta ke koi ye jane admi hain

jab dawar-e-qayamat puchhega tum pe rakh kar

kah denge saf ham to begane admi hain

main wo bashar ke mujh se har admi ko nafrat

tum shama wo ke tum par parwane admi hain

mahfil bhari hui hai saudaiyon se us ki

is ghairat-e-pari par diwane admi hain

shabash dagh tujh ko kya tegh-e-ishq khai

ji karte hain wahi jo mardane admi hain