رکھتا ہے صدا ہونٹ کو جوں گل کی کلی چپ

رکھتا ہے صدا ہونٹ کو جوں گل کی کلی چپ

وہ غنچہ دہن آہ یہ سیکھا ہے بھلی چپ

سوتا ہے تو لیتا ہوں میں یوں چوری سے بوسہ

جوں منہ میں کھلا دے کوئی مصری کی ڈلی چپ

منت سے کہا ہم نے تو تم آہ نہ بولے

جب غیر نے کی گدگدی پھر کچھ نہ چلی چپ

پروانے سے عاشق کے تئیں شمع جلا کر

پھر آپ بھی روتی ہے کھڑی بخت جلی چپ

سبزی بھی اگی باغ میں غنچے بھی کھلے آہ

پر اس مری گونگی کے لبوں سے نہ ٹلی چپ

غصے میں رقیب آتا ہے جب بھوت سا بن کر

پڑھتا ہوں میں جب دل میں کھڑا نعت علی چپ

مر جائیں پہ شکوے کی کبھی بات نہ نکلے

یہ ہونٹ وہ ہیں جن میں ازل سے ہے پلی چپ

جس دم یہ خبر جا کے رقیبوں کو ہوئی پھر

بس سنتے ہی سن ہو گئے اور سانس نہ لی چپ

الٹی ہی سمجھ یار کی سنتا ہے نظیرؔ آہ

زنہار نہ کچھ بولیو یاں سب سے بھلی چپ

rakhta hai sada hont ko jun gul ki kali chup

wo ghuncha dahan ah ye sikha hai bhali chup

sota hai to leta hun main yun chori se bosa

jun munh mein khula de koi misri ki dali chup

minnat se kaha ham ne to tum ah na bole

jab ghair ne ki gudgudi phir kuchh na chali chup

parwane se ashiq ke tain shama jala kar

phir ap bhi roti hai khari bakht jali chup

sabzi bhi ugi bagh mein ghunche bhi khule ah

par is miri gungi ke labon se na tali chup

ghusse mein raqib ata hai jab bhut sa ban kar

parhta hun main jab dil mein khara naat ali chup

mar jaen pe shikwe ki kabhi bat na nikle

ye hont wo hain jin mein azal se hai pali chup

jis dam ye khabar ja ke raqibon ko hui phir

bas sunte hi sun ho gae aur sans na li chup

ulti hi samajh yar ki sunta hai nazir ah

zinhar na kuchh boliyo yan sab se bhali chup