رہا نہ حلقۂ صُوفی میں سوزِ مشتاقی

رہا نہ حلقۂ صُوفی میں سوزِ مشتاقی

فسانہ ہائے کرامات رہ گئے باقی

خراب کوشکِ سُلطان و خانقاہِ فقیر

فغاں کہ تخت و مصلّٰی کمالِ زرّاقی

کرے گی داورِ محشر کو شرمسار اک روز

کتابِ صُوفی و مُلّا کی سادہ اوراقی

نہ چینی و عربی وہ، نہ رومی و شامی

سما سکا نہ دو عالم میں مردِ آفاقی

مئے شبانہ کی مستی تو ہو چکی، لیکن

کھٹک رہا ہے دلوں میں کرشمۂ ساقی

چمن میں تلخ نوائی مری گوارا کر

کہ زہر بھی کبھی کرتا ہے کارِ تریاقی

عزیز تر ہے متاعِ امیر و سُلطاں سے

وہ شعر جس میں ہو بجلی کا سوز و بَرّاقی

raha na halqa-e-sufi mein soz-e-mushtaqi

fasana hae karamat rah gae baqi

kharab koshak-e-sultan-o-khanqah-e-faqir

fughan ke takht-o-musalli kamal-e-zarraqi

karegi dawar-e-mahshar ko sharmsar ik roz

kitab-e-sufi-o-mulla ki sada auraqi

na chini-o-arabi wo, na rumi-o-shami

sama saka na do alam mein mard-e-afaqi

mai-e-shabana ki masti to ho chuki, lekin

khatak raha hai dilon mein karishma-e-saqi

chaman mein talkh nawai miri gawara kar

ke zahr bhi kabhi karta hai kar-e-tiryaqi

aziz tar hai mata-e-amir-o-sultan se

wo sher jis mein ho bijli ka soz-o-barraqi