برسات کی بہاریں

ہیں اس ہوا میں کیا کیا برسات کی بہاریں

سبزوں کی لہلہاہٹ باغات کی بہاریں

بوندوں کی جھمجھماوٹ قطرات کی بہاریں

ہر بات کے تماشے ہر گھات کی بہاریں

کیا کیا مچی ہیں یارو برسات کی بہاریں

بادل ہوا کے اوپر ہو مست چھا رہے ہیں

جھڑیوں کی مستیوں سے دھومیں مچا رہے ہیں

پڑتے ہیں پانی ہر جا جل تھل بنا رہے ہیں

گلزار بھیگتے ہیں سبزے نہا رہے ہیں

کیا کیا مچی ہیں یارو برسات کی بہاریں

مارے ہیں موج ڈابر دریا ڈونڈ رہے ہیں

مور و پپہیے کوئل کیا کیا رمنڈ رہے ہیں

جھڑ کر رہی ہیں جھڑیاں نالے امنڈ رہے ہیں

برسے ہے منہ جھڑا جھڑ بادل گھمنڈ رہے ہیں

کیا کیا مچی ہیں یارو برسات کی بہاریں

جنگل سب اپنے تن پر ہریالی سج رہے ہیں

گل پھول جھاڑ بوٹے کر اپنی دھج رہے ہیں

بجلی چمک رہی ہے بادل گرج رہے ہیں

اللہ کے نقارے نوبت کے بج رہے ہیں

کیا کیا مچی ہیں یارو برسات کی بہاریں

بادل لگا ٹکوریں نوبت کی گت لگاویں

جھینگر جھنگار اپنی سرنائیاں بجاویں

کر شور مور بگلے جھڑیوں کا منہ بلاویں

پی پی کریں پپیہے مینڈک ملاریں گاویں

کیا کیا مچی ہیں یارو برسات کی بہاریں

ہر جا بچھا رہا ہے سبزہ ہرے بچھونے

قدرت کے بچھ رہے ہیں ہر جا ہرے بچھونے

جنگلوں میں ہو رہے ہیں پیدا ہرے بچھونے

بچھوا دیے ہیں حق نے کیا کیا ہرے بچھونے

کیا کیا مچی ہیں یارو برسات کی بہاریں

سبزوں کی لہلہاہٹ کچھ ابر کی سیاہی

اور چھا رہی گھٹائیں سرخ اور سفید کاہی

سب بھیگتے ہیں گھر گھر لے ماہ تا بماہی

یہ رنگ کون رنگے تیرے سوا الٰہی

کیا کیا مچی ہیں یارو برسات کی بہاریں

کیا کیا رکھے ہیں یا رب سامان تیری قدرت

بدلے ہے رنگ کیا کیا ہر آن تیری قدرت

سب مست ہو رہے پہچان تیری قدرت

تیتر پکارتے ہیں سبحان تیری قدرت

کیا کیا مچی ہیں یارو برسات کی بہاریں

کوئل کی کوک میں بھی تیرا ہی نام ہے گا

اور مور کی زٹل میں تیرا پیام ہے گا

یہ رنگ سو مزے کا جو صبح و شام ہے گا

یہ اور کا نہیں ہے تیرا ہی کام ہے گا

کیا کیا مچی ہیں یارو برسات کی بہاریں

بولیں بئے بٹیریں قمری پکارے کو کو

پی پی کرے پپیہا بگلے پکاریں تو تو

کیا حدحدوں کی حق حق کیا فاختوں کی ہو ہو

سب رٹ رہے ہیں تجھ کو کیا پنکھ کیا پکھیرو

کیا کیا مچی ہیں یارو برسات کی ماریں

جو مست ہوں ادھر کے کر شور ناچتے ہیں

پیارے کا نام لے کر کیا زور ناچتے ہیں

بادل ہوا سے کر کر گھنگھور ناچتے ہیں

مینڈک اچھل رہے ہیں اور مور ناچتے ہیں

کیا کیا مچی ہیں یارو برسات کی بہاریں

پھولوں کی سیج اوپر سوتے ہیں کتنے بن بن

سو ہیں گلابی جوڑے پھولوں کے ہار ابرن

کتنوں کے گھر ہے کھانا سونا لگے ہے آنگن

کونے میں پڑ رہی ہیں سر منہ لپیٹ سوگن

کیا کیا مچی ہیں یارو برسات کی بہاریں

جو خوش ہیں وہ خوشی میں کاٹے ہیں رات ساری

جو غم میں ہیں انہوں پر گزرے ہے رات بھاری

سینوں سے لگ رہی ہیں جو ہیں پیا کی پیاری

چھاتی پھٹے ہے ان کی جو ہیں برہ کی ماری

کیا کیا مچی ہیں یارو برسات کی بہاریں

جو وصل میں ہیں ان کے جوڑے مہک رہے ہیں

جھولوں میں جھولتے ہیں گہنے جھمک رہے ہیں

جو دکھ میں ہیں سو ان کے سینے پھڑک رہے ہیں

آہیں نکل رہی ہیں آنسو ٹپک رہے ہیں

کیا کیا مچی ہیں یارو برسات کی بہاریں

اب برہنوں کے اوپر ہے سخت بے قراری

ہر بوند مارتی ہے سینے اپر کٹاری

بدلی کی دیکھ صورت کہتی ہیں باری باری

ہے ہے نہ لی پیا نے اب کے بھی سدھ ہماری

کیا کیا مچی ہیں یارو برسات کی بہاریں

جب کوئل اپنی ان کو آواز ہے سناتی

سنتے ہی غم کو مارے چھاتی ہے امنڈی آتی

پی پی کی دھن کو سن کر بے کل ہیں کہتی جاتی

مت بول اے پپیہے پھٹتی ہے میری چھاتی

کیا کیا مچی ہیں یارو برسات کی بہاریں

ہے جن کی سیج سونی اور خالی چارپائی

رو رو انہوں نے ہر دم یہ بات ہے سنائی

پردیسی نے ہماری اب کے بھی سدھ بھلائی

اب کے بھی چھاؤنی جا پردیس میں ہے چھائی

کیا کیا مچی ہیں یارو برسات کی بہاریں

کتنوں نے اپنی غم سے اب ہے یہ گت بنائی

میلے کچیلے کپڑے آنکھیں بھی ڈبڈبائی

نے گھر میں جھولا ڈالا نے اوڑھنی رنگائی

پھوٹا پڑا ہے چولہا ٹوٹی پڑی کڑھائی

کیا کیا مچی ہیں یارو برسات کی بہاریں

گاتی ہے گیت کوئی جھولے پہ کر کے پھیرا

مارو جی آج کیجیے یاں رین کا بسیرا

ہے خوش کسی کو آ کر ہے درد و غم نے گھیرا

منہ زرد بال بکھرے اور آنکھوں میں اندھیرا

کیا کیا مچی ہیں یارو برسات کی بہاریں

اور جن کو اب مہیا حسنوں کی ڈھیریاں ہیں

سرخ اور سنہرے کپڑے عشرت کی گھیریاں ہیں

محبوب دلبروں کی زلفیں بکھیریاں ہیں

جگنو چمک رہے ہیں راتیں اندھیریاں ہیں

کیا کیا مچی ہیں یارو برسات کی بہاریں

کتنے تو بھنگ پی پی کپڑے بھگو رہے ہیں

باہیں گلوں میں ڈالے جھولوں میں سو رہے ہیں

کتنے برہ کے مارے سدھ اپنی کھو رہے ہیں

جھولے کی دیکھ صورت ہر آن رو رہے ہیں

کیا کیا مچی ہیں یارو برسات کی بہاریں

بیٹھے ہیں کتنے خوش ہو اونچے چھوا کے بنگلے

پیتے ہیں مے کے پیالے اور دیکھتے ہیں جنگلے

کتنے پھرے ہیں باہر خوباں کو اپنے سنگ لے

سب شاد ہو رہے ہیں عمدہ غریب کنگلے

کیا کیا مچی ہیں یارو برسات کی بہاریں

کتنوں کو محلوں اندر ہے عیش کا نظارا

یا سائبان ستھرا یا بانس کا اسارا

کرتا ہے سیر کوئی کوٹھے کا لے سہارا

مفلس بھی کر رہا ہے پولے تلے گزارا

کیا کیا مچی ہیں یارو برسات کی بہاریں

چھت گرنے کا کسی جا غل شور ہو رہا ہے

دیوار کا بھی دھڑکا کچھ ہوش کھو رہا ہے

در در حویلی والا ہر آن رو رہا ہے

مفلس سو جھوپڑے میں دل شاد سو رہا ہے

کیا کیا مچی ہیں یارو برسات کی بہاریں

مدت سے ہو رہا ہے جن کا مکاں پرانا

اٹھ کے ہے ان کو مینہ میں ہر آن چھت پہ جانا

کوئی پکارتا ہے ٹک موری کھول آنا

کوئی کہے ہے چل بھی کیوں ہو گیا دوانا

کیا کیا مچی ہیں یارو برسات کی بہاریں

کوئی پکارتا ہے لو یہ مکان ٹپکا

گرتی ہے چھت کی مٹی اور سائبان ٹپکا

چھلنی ہوئی اٹاری کوٹھا ندان ٹپکا

باقی تھا اک اسارا سو وہ بھی آن ٹپکا

کیا کیا مچی ہیں یارو برسات کی بہاریں

اونچا مکان جس کا ہے پچ کھنا سوایا

اوپر کا کھن ٹپک کر جب پانی نیچے آیا

اس نے تو اپنے گھر میں ہے شور غل مچایا

مفلس پکارتے ہیں جانے ہمارا

کیا کیا مچی ہیں یارو برسات کی بہاریں

سبزوں پہ بیر بھوٹی ٹیلوں اپر دھتورے

پسو سے مچھروں سے روئے کوئی بسورے

بچھو کسی کو کاٹے کیڑا کسی کو گھورے

آنگن میں کنسلائی کونوں میں کھن کھجورے

کیا کیا مچی ہیں یارو برسات کی بہاریں

پھنسی کسی کے تن میں سر پر کسی کے پھوڑے

چھاتی یہ گرمی دانے اور پیٹھ میں دودڑے

کھا پوریاں کسی کو ہیں لگ رہے مروڑے

آتے ہیں دست جیسے دوڑیں عراقی گھوڑے

کیا کیا مچی ہیں یارو برسات کی بہاریں

پتلی جہاں کسی نے دال اور کڑھی پکائی

مکھی نے ووہیں بولی آ اونٹ کی بلائی

کوئی پکارتا ہے کیوں خیر تو ہے بھائی

ایسے جو کھانستے ہو کیا کالی مرچ کھائی

کیا کیا مچی ہیں یارو برسات کی بہاریں

جس گل بدن کے تن میں پوشاک سوسنی ہے

سو وہ پری تو خاصی کالی گھٹا بنی ہے

اور جس پہ سرخ جوڑا یا اودی اوڑھنی ہے

اس پر تو سب گھلاوٹ برسات کی چھنی ہے

کیا کیا مچی ہیں یارو برسات کی بہاریں

بدنوں میں کھب رہے ہیں خوبوں کے لال جوڑے

جھمکیں دکھا رہے ہیں پریوں کے لال جوڑے

لہریں بنا رہے ہیں لڑکوں کے لال جوڑے

آنکھوں میں چبھ رہے ہیں پیاروں کے لال جوڑے

کیا کیا مچی ہیں یارو برسات کی بہاریں

اور جس صنم کے تن میں جوڑا ہے زعفرانی

گلنار یا گلابی یا زرد سرخ دھانی

کچھ حسن کی چڑھائی اور کچھ نئی جوانی

جھولوں میں جھولتے ہیں اوپر پڑے ہے پانی

کیا کیا مچی ہیں یارو برسات کی بہاریں

کوئی تو جھولنے میں جھولے کی ڈور چھوڑے

یا ساتھیوں میں اپنے پاؤں سے پاؤں جوڑے

بادل کھڑے ہیں سر پر برسے ہیں تھوڑے تھوڑے

بوندوں میں بھیگتے ہیں لال اور گلابی جوڑے

کیا کیا مچی ہیں یارو برسات کی بہاریں

کتنوں کو ہو رہی ہے اس عیش کی نشانی

سوتے ہیں ساتھ جس کے کہتی ہے وہ سیانی

اس وقت تم نہ جاؤ اے میرے یار جانی

دیکھو تو کس مزے سے برسے ہے آج پانی

کیا کیا مچی ہیں یارو برسات کی بہاریں

کتنے شراب پی کر ہو مست چھک رہے ہیں

مے کی گلابی آگے پیالے چھلک رہے ہیں

ہوتا ہے ناچ گھر گھر گھنگھرو جھنک رہے ہیں

پڑتا ہے مینہ جھڑا جھڑ طبلے کھڑک رہے ہیں

کیا کیا مچی ہیں یارو برسات کی بہاریں

ہیں جن کے تن ملائم میدے کی جیسے لوئی

وہ اس ہوا میں خاصی اوڑھے پھرے ہیں لوئی

اور جن کی مفلسی نے شرم و حیا ہے کھوئی

ہے ان کے سر پہ سر کی یا بوریے کی کھوئی

کیا کیا مچی ہیں یارو برسات کی بہاریں

کتنے پھرے ہیں اوڑھے پانی میں سرخ پٹو

جو دیکھ سرخ بدلی ہوتی ہے ان پہ لٹو

کتنوں کی گاڑی رتھ ہیں کتنوں کے گھوڑے ٹٹو

جس پاس کچھ نہیں ہے وہ ہم سا ہے نکھٹو

کیا کیا مچی ہیں یارو برسات کی بہاریں

جو اس ہوا میں یارو دولت میں کچھ بڑھے ہیں

ہے ان کے سر پہ چھتری ہاتھی پہ وہ چڑھے ہیں

ہم سے غریب غربا کیچڑ میں گر پڑے ہیں

ہاتھوں میں جوتیاں ہیں اور پائنچے چڑھے ہیں

کیا کیا مچی ہیں یارو برسات کی بہاریں

ہے جن کنے مہیا پکا پکایا کھانا

ان کو پلنگ پہ بیٹھے جھڑیوں کا خط اڑانا

ہے جن کو اپنے گھر میں یاں لون تیل لانا

ہے سر پہ ان کے پنکھا یا چھاج ہے پرانا

کیا کیا مچی ہیں یارو برسات کی بہاریں

کتنے خوشی سے بیٹھے کھاتے ہیں خوش محل میں

کتنے چلے ہیں لینے بنئے سے قرض پل میں

کاندھے پہ دال آٹا ہلدی گرہ نے مل میں

ہاتھوں میں گھی کی پیالی اور لکڑیاں بغل میں

کیا کیا مچی ہیں یارو برسات کی بہاریں

جو کسبیاں جوانیں حسنوں میں پرتیاں ہیں

سینوں میں لال انگیاں اور لال کرتیاں ہیں

نظریں بھی بدلیاں ہیں دل میں بھی سرتیاں ہیں

اک اک نگہ میں کافر بجلی کی پھرتیاں ہیں

کیا کیا مچی ہیں یارو برسات کی بہاریں

جو نوجواں ہیں ان کی تیاریاں بڑی ہیں

ہاتھوں میں لال چھڑیاں کوٹھوں پہ وہ کھڑی ہیں

اور وہ جو آشنا سے جھگڑی ہیں یا لڑی ہیں

منہ کو چھپا پلنگ پر مچلی ہوئی پڑی ہیں

کیا کیا مچی ہیں یارو برسات کی بہاریں

کوئی اپنے آشنا سے کر ناز کا جھپٹا

کہتی ہے ہنس کے کافر چٹکی لے یا نہٹا

تم سے تو دل ہمارا اب ہو گیا ہے کھٹا

تم آج بھی نہ لائے رنگوا مرا دوپٹا

کیا کیا مچی ہیں یارو برسات کی بہاریں

کہتی ہیں کوئی مجھ کو جوڑا سوہا بنا دو

یا ٹاٹ بافی جوتا یا کفش سرخ لا دو

کوئی کہے ہے میری کرتی ابھی رنگا دو

یا گرم سے اندرسے اک سیر بھر منگا دو

کیا کیا مچی ہیں یارو برسات کی بہاریں

جو ان کے مبتلا ہیں سب چیز لا رہے ہیں

کرتی بنا رہے ہیں انگیا رنگا رہے ہیں

جو جو ہیں ان کی باتیں سب کچھ اٹھا رہے ہیں

باہیں گلے میں ڈالے عشرت منا رہے ہیں

کیا کیا مچی ہیں یارو برسات کی بہاریں

کتنوں نے قول باندھا معمولی دے کے پیسے

کہتے ہیں شاد ہو کر یوں اپنے آشنا سے

برسات بھر تو مل کے سنتے ہو جان پیارے

احمق ہو جو پلنگ سے اب موتنے کو اترے

کیا کیا مچی ہیں یارو برسات کی بہاریں

یہ سن کے ان سے ہنس ہنس کہتی ہے شوخ رنڈی

معمولی اب تو لے کر بندی بھی ہے گھمنڈی

ہم پہنیں لال جوڑا تم پہنو خاصی بنڈی

خندی ہو جو تمہاری چھاتی کرے نہ ٹھنڈی

کیا کیا مچی ہیں یارو برسات کی بہاریں

زردار کی تو ان میں ہے بچھ رہی پلنگڑی

دلبر پری سی بیٹھی جھمکائے چوڑی نبگڑی

مفلس کی ٹوٹی پٹی یا ٹاٹ کی جھلنگڑی

رنڈی ملی تو کالی یا کنجی لولی لنگڑی

کیا کیا مچی ہیں یارو برسات کی بہاریں

کرتی گلابی جن میں گوٹے لگے ہوئے ہیں

انگیاں کے گرد جھوٹے گوٹے ٹکے ہوئے ہیں

کہتی ہیں ان سے ہنس ہنس جو جو کٹے ہوئے ہیں

لا اب تو میرے تجھ پر بارہ ٹکے ہوئے ہیں

کیا کیا مچی ہیں یارو برسات کی بہاریں

جو بیگمی ہے گھر میں آرام کر رہی ہے

پردوں میں دوستوں سے پیغام کر رہی ہے

چتون لگاوٹوں سے سو دام کر رہی ہے

چپکے ہی چپکے اپنا سب کام کر رہی ہے

کیا کیا مچی ہیں یارو برسات کی بہاریں

کہتا ہے کوئی اپنے محبوب سیم بر سے

وہ اس مینہ میں نہ جاؤ پیارے ہمارے برسے

کوئی کہے ہے اپنے دل دار خوش نظر سے

ہاتھوں سے میرے جانی کھا لے یہ دو اندرسے

کیا کیا مچی ہیں یارو برسات کی بہاریں

کہتا ہے کوئی پیاری جو کچھ کہو سو لا دیں

زر دوزی ٹاٹ بافی جوتا کہو پہنا دیں

پیڑا جلیبی لڈو جو کھاؤ سو منگا دیں

چیرا دوپٹہ جامہ جیسا کہو رنگا دیں

کیا کیا مچی ہیں یارو برسات کی بہاریں

جن دلبروں کے تن پر ہیں گرمی دانے آلے

کہتے ہیں ان کو عاشق یوں پیار سے بلا لے

کیا مینہ برس رہا ہے پیارے ذرا نہا لے

چھاتی نہیں تو پیارے ٹک پیٹھ ہی ملا لے

کیا کیا مچی ہیں یارو برسات کی بہاریں

اس رت میں ہیں جہاں تک گلزار بھیگتے ہیں

شہر و دیار کوچے بازار بھیگتے ہیں

صحرا و جھاڑ بوٹے کہسار بھیگتے ہیں

عاشق نہا رہے ہیں دل دار بھیگتے ہیں

کیا کیا مچی ہیں یارو برسات کی بہاریں

کہتی ہے جب وہ سن کر یہ بات بھیگ احمق

ماروں گی تیرے آ کر اک لات بھیگ احمق

مجھ کو بھی ضد چڑھی ہے دن رات بھیگ احمق

یوں ہی تو اب کے ساری برسات بھیگ احمق

کیا کیا مچی ہیں یارو برسات کی بہاریں

زردار کی تو سن کر آواز وہ پری رو

کہتی ہے لونڈیوں سے جلدی کواڑ کھولو

مفلس کوئی پکارے تو اس سے کہتی ہے وہ

ہرگز کوئی نہ بولو احمق کو بھیگنے دو

کیا کیا مچی ہیں یارو برسات کی بہاریں

کوئی یار سے کہے ہے اے دل ستان آؤ

بدلی بڑی اٹھی ہے کہنے کو مان آؤ

کیا مینہ برس رہا ہے ہر اک مکان آؤ

راتیں اندھیریاں ہیں اے میری جان آؤ

کیا کیا مچی ہیں یارو برسات کی بہاریں

کوئی رات کو پکارے پیارے میں بھیگتی ہوں

کیا تیری الفتوں کے مارے میں بھیگتی ہوں

آئی ہوں تیری خاطر آ رے میں بھیگتی ہوں

کچھ تو ترس تو میرا کھا رے میں بھیگتی ہوں

کیا کیا مچی ہیں یارو برسات کی بہاریں

کوئی پکارتی ہے دل سخت بھیگتی ہوں

کانپے ہے میری چھاتی یک لخت بھیگتی ہوں

کپڑے بھی تر بہ تر ہیں اور سخت بھیگتی ہوں

جلدی بلا لے مجھ کو کمبخت بھیگتی ہوں

کیا کیا مچی ہیں یارو برسات کی بہاریں

شیشہ کہیں گلابی بوتل جھمک رہی ہے

رابیل موتیا کی خوشبو مہک رہی ہے

چھاتی سے چھاتی لگ کر عشرت چھلک رہی ہے

پائے کھٹک رہے ہیں پٹی چٹک رہی ہے

کیا کیا مچی ہیں یارو برسات کی بہاریں

کوئی پکارتی ہے کیا کیا مجھے بھگویا

کوئی پکارتی ہے کیسا مجھے بھگویا

ناحق قرار کر کے جھوٹا مجھے بھگویا

یوں دور سے بلا کر اچھا مجھے بھگویا

کیا کیا مچی ہیں یارو برسات کی بہاریں

جن دلبروں کی خاطر بھیگے ہیں جن کے جوڑے

وہ دیکھ ان کی الفت ہوتے ہیں تھوڑے تھوڑے

لے ان کے بھیگے کپڑے ہاتھوں میں دھر نچوڑے

چیرا کوئی سنگھاوے جامہ کوئی نچوڑے

کیا کیا مچی ہیں یارو برسات کی بہاریں

کیچڑ سے ہو رہی ہے جس جا زمیں پھسلنی

مشکل ہوئی ہے واں سے ہر اک کو راہ چلنی

پھسلا جو پاؤں پگڑی مشکل ہے پھر سنبھلنی

جوتی گری تو واں سے کیا تاب پھر نکلی

کیا کیا مچی ہیں یارو برسات کی بہاریں

کتنے تو کیچڑوں کی دلدل میں پھنس رہے ہیں

کپڑے تمام گندی دلدل میں بس رہے ہیں

کتنے اٹھے ہیں مرمر کتنے اکس رہے ہیں

وہ دکھ میں پھنس رہے ہیں اور لوگ ہنس رہے ہیں

کیا کیا مچی ہیں یارو برسات کی بہاریں

کہتا ہے کوئی گر کر یہ اے خدائے لیجو

کوئی ڈگمگا کے ہر دم کہتا ہے وائے لیجو

کوئی ہاتھ اٹھا پکارے مجھ کو بھی ہائے لیجو

کوئی شور کر پکارے گرنے نہ پائے لیجو

کیا کیا مچی ہیں یارو برسات کی بہاریں

گر کر کسی کے کپڑے دلدل میں ہیں معطر

پھسلا کوئی کسی کا کیچڑ میں منہ گیا بھر

اک دو نہیں پھسلتے کچھ اس میں آن اکثر

ہوتے ہیں سیکڑوں کے سر نیچے پاؤں اوپر

کیا کیا مچی ہیں یارو برسات کی بہاریں

یہ رت وہ ہے کہ جس میں خرد و کبیر خوش ہیں

ادنیٰ غریب مفلس شاہ و وزیر خوش ہیں

معشوق شاد و خرم عاشق اسیر خوش ہیں

جتنے ہیں اب جہاں میں سب اے نظیرؔ خوش ہیں

کیا کیا مچی ہیں یارو برسات کی بہاریں

hain is hawa mein kya kya barsat ki baharen

sabzon ki lahlihahat baghat ki baharen

bundon ki jhamjhamaot qutrat ki baharen

har bat ke tamashe har ghat ki baharen

kya kya machi hain yaro barsat ki baharen

badal hawa ke upar ho mast chha rahe hain

jhariyon ki mastiyon se dhumen macha rahe hain

parte hain pani har ja jal thal bana rahe hain

gulzar bhigte hain sabze naha rahe hain

kya kya machi hain yaro barsat ki baharen

mare hain mauj dabar dariya dond rahe hain

mor-o-paphaye koyal kya kya ramnad rahe hain

jhar kar rahi hain jhariyan nale umand rahe hain

barse hai munh jhara jhar badal ghamand rahe hain

kya kya machi hain yaro barsat ki baharen

jangal sab apne tan par hariyali saj rahe hain

gul phul jhar bute kar apni dhaj rahe hain

bijli chamak rahi hai badal garaj rahe hain

allah ke naqqare naubat ke baj rahe hain

kya kya machi hain yaro barsat ki baharen

badal laga takoren naubat ki gat lagawen

jhingar jhingar apni sarnaiyan bajawen

kar shor-e-mor bagle jhariyon ka munh bulawen

pi pi karen papihe mendak malaren gawen

kya kya machi hain yaro barsat ki baharen

har ja bichha raha hai sabza hare bichhaune

qudrat ke bichh rahe hain har ja hare bichhaune

jangalon mein ho rahe hain paida hare bichhaune

bichhwa diye hain haq ne kya kya hare bichhaune

kya kya machi hain yaro barsat ki baharen

sabzon ki lahlihahat kuchh abr ki siyahi

aur chha rahi ghataen surkh aur safed kahi

sab bhigte hain ghar ghar le mah ta bamahi

ye rang kaun range tere siwa ilahi

kya kya machi hain yaro barsat ki baharen

kya kya rakhe hain ya rab saman teri qudrat

badle hai rang kya kya har an teri qudrat

sab mast ho rahe pahchan teri qudrat

titar pukarte hain subhan teri qudrat

kya kya machi hain yaro barsat ki baharen

koyal ki kok mein bhi tera hi nam hai ga

aur mor ki zatal mein tera payam hai ga

ye rang so maze ka jo subh-o-sham hai ga

ye aur ka nahin hai tera hi kam hai ga

kya kya machi hain yaro barsat ki baharen

bolen be bateren qumri pukare ko ko

pi pi kare papiha bagle pukaren to to

kya hadhadon ki haq haq kya fakhton ki ho ho

sab rit rahe hain tujh ko kya pankh kya pakhero

kya kya machi hain yaro barsat ki maren

jo mast hun idhar ke kar shor nachte hain

pyare ka nam le kar kya zor nachte hain

badal hawa se kar kar ghanghor nachte hain

mendak uchhal rahe hain aur mor nachte hain

kya kya machi hain yaro barsat ki baharen

phulon ki sej upar sote hain kitne ban ban

so hain gulabi jore phulon ke har abran

kitnon ke ghar hai khana sona lage hai angan

kone mein par rahi hain sar munh lapet sogin

kya kya machi hain yaro barsat ki baharen

jo khush hain wo khushi mein kate hain rat sari

jo gham mein hain unhon par guzre hai rat bhari

sinon se lag rahi hain jo hain piya ki pyari

chhati phate hai un ki jo hain bira ki mari

kya kya machi hain yaro barsat ki baharen

jo wasl mein hain un ke jore mahak rahe hain

jhulon mein jhulte hain gahne jhamak rahe hain

jo dukh mein hain so un ke sine pharak rahe hain

ahen nikal rahi hain ansu tapak rahe hain

kya kya machi hain yaro barsat ki baharen

ab birhanon ke upar hai sakht be qarari

har bund marti hai sine upar katari

badli ki dekh surat kahti hain bari bari

hai hai na li piya ne ab ke bhi sudh hamari

kya kya machi hain yaro barsat ki baharen

jab koyal apni un ko awaz hai sunati

sunte hi gham ko mare chhati hai umandi ati

pi pi ki dhun ko sun kar be kal hain kahti jati

mat bol ai papihe phatti hai meri chhati

kya kya machi hain yaro barsat ki baharen

hai jin ki sej suni aur khali charpai

ro ro unhon ne har dam ye bat hai sunai

pardesi ne hamari ab ke bhi sudh bhalai

ab ke bhi chhaoni ja pardes mein hai chhai

kya kya machi hain yaro barsat ki baharen

kitnon ne apni gham se ab hai ye gat banai

mele kuchaile kapre ankhen bhi dabdbai

ne ghar mein jhula dala ne orhni rangai

phuta para hai chulha tuti pari karhai

kya kya machi hain yaro barsat ki baharen

gati hai git koi jhule pe kar ke phera

maro ji aj kijiye yan rain ka basera

hai khush kisi ko a kar hai dard-o-gham ne ghera

munh zard bal bikhre aur ankhon mein andhera

kya kya machi hain yaro barsat ki baharen

aur jin ko ab mahiya husnon ki dhiriyan hain

surkh aur sunahre kapre ishrat ki gheriyan hain

mahbub dilbaron ki zulfen bakheriyan hain

jugnu chamak rahe hain raten andheriyan hain

kya kya machi hain yaro barsat ki baharen

kitne to bhang pi pi kapre bhigo rahe hain

bahen gulon mein dale jhulon mein so rahe hain

kitne bira ke mare sudh apni kho rahe hain

jhule ki dekh surat har an ro rahe hain

kya kya machi hain yaro barsat ki baharen

baithe hain kitne khush ho unche chhua ke bangle

pite hain mai ke pyale aur dekhte hain jangle

kitne phire hain bahar khuban ko apne sang le

sab shad ho rahe hain umda gharib kingale

kya kya machi hain yaro barsat ki baharen

kitnon ko mahlon andar hai aish ka nazara

ya saiban suthra ya bans ka usara

karta hai sair koi kothe ka le sahara

muflis bhi kar raha hai pole tale guzara

kya kya machi hain yaro barsat ki baharen

chhat girne ka kisi ja ghul shor ho raha hai

diwar ka bhi dharka kuchh hosh kho raha hai

dar dar haweli wala har an ro raha hai

muflis so jhunopare mein dil shad so raha hai

kya kya machi hain yaro barsat ki baharen

muddat se ho raha hai jin ka makan purana

uth ke hai un ko menh mein har an chhat pe jana

koi pukarta hai tuk mori khol ana

koi kahe hai chal bhi kyun ho gaya dawana

kya kya machi hain yaro barsat ki baharen

koi pukarta hai lo ye makan tapka

girti hai chhat ki mitti aur saiban tapka

chhalni hui atari kotha nidan tapka

baqi tha ik usara so wo bhi an tapka

kya kya machi hain yaro barsat ki baharen

uncha makan jis ka hai pich khana siwaya

upar ka khan tapak kar jab pani niche aya

us ne to apne ghar mein hai shor ghul machaya

muflis pukarte hain jane hamara

kya kya machi hain yaro barsat ki baharen

sabzon pe bair bhuti telun upar dhatore

piso se machchharon se roe koi bisure

bichho kisi ko kate kira kisi ko ghore

angan mein kinsulai kaunon mein khan khajure

kya kya machi hain yaro barsat ki baharen

phansi kisi ke tan mein sar par kisi ke phore

chhati ye garmi dane aur pith mein dodre

kha puriyan kisi ko hain lag rahe marore

ate hain dast jaise dauren iraqi ghore

kya kya machi hain yaro barsat ki baharen

putli jahan kisi ne dal aur karhi pakai

makkhi ne wohain boli a unt ki bulai

koi pukarta hai kyun khair to hai bhai

aise jo khanaste ho kya kali mirch khai

kya kya machi hain yaro barsat ki baharen

jis gul badan ke tan mein poshak susani hai

so wo pari to khasi kali ghata bani hai

aur jis pe surkh jora ya audi orhni hai

us par to sab ghulawat barsat ki chhanni hai

kya kya machi hain yaro barsat ki baharen

badnon mein khab rahe hain khubon ke lal jore

jhamken dikha rahe hain pariyon ke lal jore

lahren bana rahe hain larkon ke lal jore

ankhon mein chubh rahe hain pyaron ke lal jore

kya kya machi hain yaro barsat ki baharen

aur jis sanam ke tan mein jora hai zafrani

gulnar ya gulabi ya zard surkh dhani

kuchh husn ki charhai aur kuchh nai jawani

jhulon mein jhulte hain upar pare hai pani

kya kya machi hain yaro barsat ki baharen

koi to jhulne mein jhule ki dor chhore

ya sathiyon main apne paon se paon jore

badal khare hain sar par barse hain thore thore

bundon mein bhigte hain lal aur gulabi jore

kya kya machi hain yaro barsat ki baharen

kitnon ko ho rahi hai is aish ki nishani

sote hain sath jis ke kahti hai wo siyani

is waqt tum na jao ai mere yar jani

dekho to kis maze se barse hai aj pani

kya kya machi hain yaro barsat ki baharen

kitne sharab pi kar ho mast chhak rahe hain

mai ki gulabi age pyale chhalak rahe hain

hota hai nach ghar ghar ghunghru jhanak rahe hain

parta hai menh jhara jhar table khark rahe hain

kya kya machi hain yaro barsat ki baharen

hain jin ke tan mulaim maide ki jaise loi

wo is hawa mein khasi orhe phire hain loi

aur jin ki muflisi ne sharm-o-haya hai khoi

hai un ke sar pe sar ki ya borye ki khoi

kya kya machi hain yaro barsat ki baharen

kitne phire hain orhe pani mein surkh pito

jo dekh surkh badli hoti hai un pe luto

kitnon ki gari rath hain kitnon ke ghore tuto

jis pas kuchh nahin hai wo ham sa hai nikhattu

kya kya machi hain yaro barsat ki baharen

jo is hawa mein yaro daulat mein kuchh barhe hain

hai un ke sar pe chhatri hathi pe wo charhe hain

ham se gharib gharban kichar mein gir pare hain

hathon mein jutiyan hain aur painche charhe hain

kya kya machi hain yaro barsat ki baharen

hai jin kanne mahiya paka pakaya khana

un ko palang pe baithe jhariyon ka khat urana

hai jin ko apne ghar mein yan lon tel lana

hai sar pe un ke pankha ya chhaj hai purana

kya kya machi hain yaro barsat ki baharen

kitne khushi se baithe khate hain khush mahal mein

kitne chale hain lene baniye se qarz pal mein

kandhe pe dal ata haldi girah ne mil mein

hathon mein ghi ki piyali aur lakriyan baghal mein

kya kya machi hain yaro barsat ki baharen

jo kasbiyan jawanen husnon mein partiyan hain

sinon mein lal angiyan aur lal kurtiyan hain

nazren bhi badliyan hain dil mein bhi surtiyan hain

ik ik nigah mein kafir bijli ki phurtiyan hain

kya kya machi hain yaro barsat ki baharen

jo naujawan hain un ki tayyariyan bari hain

hathon mein lal chhariyan kothon pe wo khari hain

aur wo jo ashna se jhagri hain ya lari hain

munh ko chhupa palang par machli hui pari hain

kya kya machi hain yaro barsat ki baharen

koi apne ashna se kar naz ka jhapta

kahti hai hans ke kafir chutki le ya nuhatta

tum se to dil hamara ab ho gaya hai khata

tum aj bhi na lae rangwa mira dopatta

kya kya machi hain yaro barsat ki baharen

kahti hain koi mujh ko jora soha bana do

ya tat bafi jota ya kafsh surkh la do

koi kahe hai meri karti abhi ranga do

ya garm se andarse ik sair bhar manga do

kya kya machi hain yaro barsat ki baharen

jo un ke mubtala hain sab chiz la rahe hain

karti bana rahe hain angiya ranga rahe hain

jo jo hain un ki baten sab kuchh utha rahe hain

bahen gale mein dale ishrat mana rahe hain

kya kya machi hain yaro barsat ki baharen

kitnon ne qaul bandha maamuli de ke paise

kahte hain shad ho kar yun apne ashna se

barsat bhar to mil ke sunte ho jan pyare

ahmaq ho jo palang se ab mutne ko utre

kya kya machi hain yaro barsat ki baharen

ye sun ke un se hans hans kahti hai shokh randi

maamuli ab to le kar bandi bhi hai ghumandi

ham pahnen lal jora tum pahno khasi bandi

khandi ho jo tumhari chhati kare na thandi

kya kya machi hain yaro barsat ki baharen

zardar ki to un mein hai bichh rahi palangri

dilbar pari si baithi jhamkae chauri nibguri

muflis ki tuti piti ya tat ki jhalnagari

randi mili to kali ya kanji loli langri

kya kya machi hain yaro barsat ki baharen

karti gulabi jin mein gote lage hue hain

angiyan ke gard jhute gote tike hue hain

kahti hain un se hans hans jo jo kate hue hain

la ab to mere tujh par bara tike hue hain

kya kya machi hain yaro barsat ki baharen

jo begami hai ghar mein aram kar rahi hai

pardon mein doston se paigham kar rahi hai

chitwan lagawaton se so dam kar rahi hai

chupke hi chupke apna sab kam kar rahi hai

kya kya machi hain yaro barsat ki baharen

kahta hai koi apne mahbub sim bar se

wo is menh mein na jao pyare hamare barse

koi kahe hai apne dil dar khush nazar se

hathon se mere jani kha le ye do andarse

kya kya machi hain yaro barsat ki baharen

kahta hai koi pyari jo kuchh kaho so la den

zar dozi tat bafi jota kaho pahna den

pera jalebi laddu jo khao so manga den

chira dupatta jama jaisa kaho ranga den

kya kya machi hain yaro barsat ki baharen

jin dilbaron ke tan par hain garmi dane ale

kahte hain un ko ashiq yun pyar se bala le

kya menh baras raha hai pyare zara naha le

chhati nahin to pyare tuk pith hi mila le

kya kya machi hain yaro barsat ki baharen

is rut mein hain jahan tak gulzar bhigte hain

shahr-o-dayar kuche bazar bhigte hain

sahra-o-jhar bute kohsar bhigte hain

ashiq naha rahe hain dil dar bhigte hain

kya kya machi hain yaro barsat ki baharen

kahti hai jab wo sun kar ye bat bhig ahmaq

marungi tere a kar ik lat bhig ahmaq

mujh ko bhi zid charhi hai din rat bhig ahmaq

yun hi to ab ke sari barsat bhig ahmaq

kya kya machi hain yaro barsat ki baharen

zardar ki to sun kar awaz wo pari ru

kahti hai laundiyon se jaldi kiwar kholo

muflis koi pukare to us se kahti hai wo

hargiz koi na bolo ahmaq ko bhigne do

kya kya machi hain yaro barsat ki baharen

koi yar se kahe hai ai dil sitan ao

badli bari uthi hai kahne ko man ao

kya menh baras raha hai har ik makan ao

raten andheriyan hain ai meri jan ao

kya kya machi hain yaro barsat ki baharen

koi rat ko pukare pyare mein bhigti hun

kya teri ulfaton ke mare mein bhigti hun

ai hun teri khatir a re mein bhigti hun

kuchh to taras to mera kha re mein bhigti hun

kya kya machi hain yaro barsat ki baharen

koi pukarti hai dil sakht bhigti hun

kanpe hai meri chhati yak lakht bhigti hun

kapre bhi tar ba tar hain aur sakht bhigti hun

jaldi bala le mujh ko kambakht bhigti hun

kya kya machi hain yaro barsat ki baharen

shisha kahin gulabi botal jhamak rahi hai

rabel motiya ki khushbu mahak rahi hai

chhati se chhati lag kar ishrat chhalak rahi hai

pae khatak rahe hain piti chutak rahi hai

kya kya machi hain yaro barsat ki baharen

koi pukarti hai kya kya mujhe bhigoya

koi pukarti hai kaisa mujhe bhigoya

nahaq qarar kar ke jhuta mujhe bhigoya

yun dur se bala kar achchha mujhe bhigoya

kya kya machi hain yaro barsat ki baharen

jin dilbaron ki khatir bhige hain jin ke jore

wo dekh un ki ulfat hote hain thore thore

le un ke bhige kapre hathon mein dhar nichore

chira koi sunghawe jama koi nichore

kya kya machi hain yaro barsat ki baharen

kichar se ho rahi hai jis ja zamin phisalni

mushkil hui hai wan se har ik ko rah chalni

phisla jo paon pagri mushkil hai phir sambhalni

joti giri to wan se kya tab phir nikli

kya kya machi hain yaro barsat ki baharen

kitne to kicharon ki daldal mein phans rahe hain

kapre tamam gandi daldal mein bas rahe hain

kitne uthe hain marmar kitne akas rahe hain

wo dukh mein phans rahe hain aur log hans rahe hain

kya kya machi hain yaro barsat ki baharen

kahta hai koi gir kar ye ai khuda-e-lijo

koi dagmaga ke har dam kahta hai wae lijo

koi hath utha pukare mujh ko bhi hae lijo

koi shor kar pukare girne na pae lijo

kya kya machi hain yaro barsat ki baharen

gir kar kisi ke kapre daldal mein hain muattar

phisla koi kisi ka kichar mein munh gaya bhar

ik do nahin phisalte kuchh is mein an aksar

hote hain saikron ke sar niche paon upar

kya kya machi hain yaro barsat ki baharen

ye rut wo hai ke jis mein khirad-o-kabir khush hain

adna gharib muflis shah-o-wazir khush hain

maashuq shad-o-khurram ashiq asir-e-khush hain

jitne hain ab jahan mein sab ai nazir khush hain

kya kya machi hain yaro barsat ki baharen