برکھا رت (اختر شیرانی)

مسوری جاتے ہوئے

آسماں پر چھا رہا ہے ابر پاروں کا ہجوم!

نو بہاروں کا ہجوم

آہ یہ رنگین آوارہ نظاروں کا ہجوم

کوہساروں کا ہجوم

بدلیاں ہیں یا کسی کے بھولے بسرے خواب ہیں

بے خود و بیتاب ہیں!

یا ہوا پر تیرتا ہے رود باروں کا ہجوم

آبشاروں کا ہجوم

پھرتی ہیں آوارہ متوالی گھٹائیں اس طرح

اور ہوائیں اس طرح

جھومتا پھرتا ہو جیسے مے گساروں کا ہجوم

بادہ خواروں کا ہجوم

وادیٔ گنگا ہے، برکھا رت ہے، کالی رات ہے

رات ہے برسات ہے

اور فضا میں تیرنے والے نظاروں کا ہجوم

نشہ زاروں کا ہجوم

نیلگوں پریاں افق میں پر ہیں پھیلائے ہوئے

بال بکھرائے ہوئے

یا امنڈ آیا ہے ساون کی بہاروں کا ہجوم

ابر پاروں کا ہجوم

ننھی ننھی بوندیں گرتی ہیں حجاب ابر سے

یا نقاب ابر سے

چھن رہا ہے قطرے بن بن کر ستاروں کا ہجوم

نور پاروں کا ہجوم

یہ گھٹائیں ہیں کہ خوابوں کے سفینے ہیں رواں

بے قرینے ہیں رواں

بادبانوں میں چھپائے چشمہ ساروں کا ہجوم

جوے باروں کا ہجوم

بجلی ہے یا نور کی زنجیر لہرائی ہوئی

پیچ و خم کھائی ہوئی

یا خمیدہ مرمریں پھولوں کے ہاروں کا ہجوم

اور ستاروں کا ہجوم

یہ سماں بجلی کا یہ مہتاب کی سی وادیاں

خواب کی سی وادیاں

نشے میں بھیگا ہوا یہ سبزہ زاروں کا ہجوم

کوہساروں میں خوشی کی بستیاں آباد ہیں

مستیاں آباد ہیں

چار سو بکھرا پڑا ہے سبزہ زاروں کا ہجوم

مرغزاروں کا ہجوم

یوں نظر آتے ہیں کہسار مسوری دور سے

مست سے مخمور سے

جوں سمندر سے جزیروں کی قطاروں کا ہجوم

سبزہ زاروں کا ہجوم

یہ سفر، یہ رات، یہ برسات اور پھر ہم سفر

الامان و الحذر

ایک حسن یاسمیں رنگیں بہاروں کا ہجوم

ماہ پاروں کا ہجوم

یہ سہانے منظر اختر مدتوں یاد آئیں گے

مدتوں تڑپائیں گے

آہ یہ رات، اف یہ مستانہ نظاروں کا ہجوم

یہ بہاروں کا ہجوم

masuri jate hue

asman par chha raha hai abr paron ka hujum!

nau baharon ka hujum

ah ye rangin awara nazaron ka hujum

kohsaron ka hujum

badliyan hain ya kisi ke bhule basre khwab hain

be khud-o-betab hain!

ya hawa par tairta hai rod baron ka hujum

absharon ka hujum

phirti hain awara mutawali ghataen is tarah

aur hawaen is tarah

jhumta phirta ho jaise mai gusaron ka hujum

bada khwaron ka hujum

wadi-e-ganga hai, barkha rut hai, kali rat hai

rat hai barsat hai

aur faza mein tairne wale nazaron ka hujum

nasha zaron ka hujum

nilgun pariyan ufuq mein par hain phailae hue

bal bikhrae hue

ya umand aya hai sawan ki baharon ka hujum

abr paron ka hujum

nanhi nanhi bunden girti hain hijab-e-abr se

ya naqab-e-abr se

chhin raha hai qatre ban ban kar sitaron ka hujum

nur paron ka hujum

ye ghataen hain ke khwabon ke safine hain rawan

be qarine hain rawan

badbanon mein chhupae chashma saron ka hujum

juwe baron ka hujum

bijli hai ya nur ki zanjir lahrai hui

pech-o-kham khai hui

ya khamida marmarin phulon ke haron ka hujum

aur sitaron ka hujum

ye saman bijli ka ye mahtab ki si wadiyan

khwab ki si wadiyan

nashe mein bhiga hua ye sabza zaron ka hujum

kohsaron mein khushi ki bastiyan abad hain

mastiyan abad hain

char su bikhra para hai sabza zaron ka hujum

marghzaron ka hujum

yun nazar ate hain kohsar masuri dur se

mast se makhmur se

jun samundar se jaziron ki qataron ka hujum

sabza zaron ka hujum

ye safar, ye rat, ye barsat aur phir ham safar

alaman-o-alhazar

ek husn yasmin rangin baharon ka hujum

mah paron ka hujum

ye suhane manzar akhtar muddaton yad aenge

muddaton tarpaen ge

ah ye rat, uf ye mastana nazaron ka hujum

ye baharon ka hujum