دیکھ دروازے سے مجھ کو وہ پری رو ہٹ گئی

دیکھ دروازے سے مجھ کو وہ پری رو ہٹ گئی

دیکھتے ہی اس کے میری جان بس چٹ پٹ گئی

تم ادھر دھوتے رہے منہ ہم ادھر روتے رہے

روتے دھوتے دو گھڑی بارے مزے سے کٹ گئی

گرد کلفت بسکہ چھائی دل سے تا آنکھوں تلک

نہر تھی جاری جو آنکھوں کی مرے سو پٹ گئی

جی ادا نے زلف نے دل ہوش غمزوں نے لیا

جنس ہستی اپنی سب غارت میں آ کر بٹ گئی

پردے ہی پردے میں دل کو خاک کر ڈالا مرے

اس ادا سے وہ پری منہ پر لیے گھونگھٹ گئی

زلف گر چھدری ہوئی تیرے تو مت کھا پیچ و تاب

کیا ہوا از بس اٹھائے بوجھ دل کے لٹ گئی

کل جو میرا خوش نگہ گزرا چمن سے اے حسنؔ

موند لی بادام نے آنکھ اور نرگس کٹ گئی

dekh darwaze se mujh ko wo pari ru hat gai

dekhte hi us ke meri jan bas chat pat gai

tum idhar dhote rahe munh ham idhar rote rahe

rote dhote do ghari bare maze se kat gai

gard kulfat baske chhai dil se ta ankhon talak

nahr thi jari jo ankhon ki mire so pat gai

ji ada ne zulf ne dil hosh ghamzon ne liya

jins-e-hasti apni sab gharat mein a kar bat gai

parde hi parde mein dil ko khak kar dala mire

is ada se wo pari munh par liye ghunghat gai

zulf gar chhidri hui tere to mat kha pech-o-tab

kya hua az bas uthae bojh dil ke lut gai

kal jo mera khush nigah guzra chaman se ai husn

mund li badam ne ankh aur nargis kat gai