دیکھ عقد ثریا ہمیں انگور کی سوجھی

دیکھ عقد ثریا ہمیں انگور کی سوجھی

کیوں بادہ کشاں ہم کو بھی کیا دور کی سوجھی

غش کھا کے گرا پہلے ہی شعلے کی جھلک سے

موسیٰ کو بھلا کہئے تو کیا طور کی سوجھی

ہم نے تو اسے دیکھ یہ جانا کہ پری ہے

پریوں نے جو دیکھا تو انہیں حور کی سوجھی

دیکھا جو نہانے میں وہ گورا بدن اس کا

بلور کی چوکی پہ جھلک نور کی سوجھی

سر پاؤں سے جب پھنس گئے اس زلف سیہ میں

جب ہم کو سیاہی شب دیجور کی سوجھی

جنت کے لئے شیخ جو کرتا ہے عبادت

کی غور جو خاطر میں تو مزدور کی سوجھی

مصنوع میں صانع نظر آوے تو نظیرؔ آہ

نزدیک کی پھر کیا ہے جہاں دور کی سوجھی

dekh aqd-e-surayya hamen angur ki sujhi

kyun bada kashan ham ko bhi kya dur ki sujhi

ghash kha ke gira pahle hi shole ki jhalak se

musa ko bhala kahiye to kya tur ki sujhi

ham ne to use dekh ye jana ke pari hai

pariyon ne jo dekha to unhen hur ki sujhi

dekha jo nahane mein wo gora badan us ka

bilur ki chauki pe jhalak nur ki sujhi

sar paon se jab phans gae is zulf-e-siyah mein

jab ham ko siyahi shab-e-dijaur ki sujhi

jannat ke liye shaikh jo karta hai ibadat

ki ghaur jo khatir mein to mazdur ki sujhi

masnau mein sane nazar awe to nazir ah

nazdik ki phir kya hai jahan dur ki sujhi