منظورتھی یہ شکل تجلّی کو نور کی

منظورتھی یہ شکل تجلّی کو نور کی

قسمت کھلی ترے قد و رخ سے ظہور کی

اِک خونچکاں کفن میں کروڑوں بناؤ ہیں

پڑتی ہے آنکھ تیرے شہیدوں پہ حور کی

واعظ! نہ تم پیو نہ کسی کو پلاسکو

کیا بات ہے تمہاری شرابِ طہور کی!

لڑتا ہے مجھ سے حشر میں قاتل، کہ کیوں اٹھا؟

گویا ابھی سنی نہیں آواز صور کی

آمد بہار کی ہے جو بلبل ہے نغمہ سنج

اڑتی سی اک خبر ہے زبانی طیور کی

گو واں نہیں، پہ واں کے نکالے ہوئے تو ہیں

کعبے سے ِان بتوں کو بھی نسبت ہے د ور کی

کیا فرض ہے کہ سب کو ملے ایک سا جواب

آؤ نہ ہم بھی سیر کریں کوہِ طور کی

گرمی سہی کلام میں، لیکن نہ اس قدر

کی جس سے بات اُس نے شکایت ضرور کی

غالب گر اِس سفر میں مجھے ساتھ لے چلیں

حج کا ثواب نذر کروں گا حضور کی

manzurthi ye shakl-e-tajalli ko nur ki

qismat khuli tire qad-o-rukh se zuhur ki

ik khunchakan kafan mein karoron banao hain

parti hai ankh tere shahidon pe hur ki

waiz! na tum piyo na kisi ko pilasako

kya bat hai tumhari sharab-e-tahur ki!

larta hai mujh se hashr mein qatil, ke kyun utha?

goya abhi suni nahin awaz-e-sur ki

amad bahar ki hai jo bulbul hai naghma sanj

urti si ik khabar hai zabani tuyur ki

go wan nahin, pe wan ke nikale hue to hain

kaabe se un buton ko bhi nisbat hai d war ki

kya farz hai ke sab ko mile ek sa jawab

ao na ham bhi sair karen koh-e-tur ki

garmi sahi kalam mein, lekin na is qadar

ki jis se bat us ne shikayat zarur ki

ghalib gar is safar mein mujhe sath le chalen

haj ka sawab nazr karunga huzur ki