حضورِ شاہ میں اہلِ سخن کی آزمائش ہے

حضورِ شاہ میں اہلِ سخن کی آزمائش ہے

چمن میں خوش نوایانِ چمن کی آزمائش ہے

قد و گیسو میں ، قیس و کوہکن کی آزمائش ہے

جہاں ہم ہیں ، وہاں دار و رسن کی آزمائش ہے

کریں گے کوہکن کے حوصلے کا امتحاں آخر

ہنوز اُس خستہ کے نیروۓ تن کی آزمائش ہے

نسیمِ مصر کو کیا پیرِ کنعاں کی ہوا خواہی!

اُسے یوسف کی بُوئے پیرہن کی آزمائش ہے

وہ آیا بزم میں ، دیکھو ، نہ کہیو پھر کہ ”غافل تھے“

شکیب و صبرِ اہلِ انجمن کی آزمائش ہے

رہے دل ہی میں تیر ، اچھا ، جگر کے پار ہو ، بہتر

غرض شِستِ بُتِ ناوک فگن کی آزمائش ہے

نہیں کچھ سُبحۂ و زُنّار کے پھندے میں گیرائی

وفاداری میں شیخ و برہمن کی آزمائش ہے

پڑا رہ ، اے دلِ وابستہ ! بیتابی سے کیا حاصل؟

مگر پھر تابِ زُلفِ پُرشکن کی آزمائش ہے

رگ و پَے میں جب اُترے زہرِ غم ، تب دیکھیے کیا ہو!

ابھی تو تلخئ کام و دہن کی آزمائش ہے

وہ آویں گے مِرے گھر ، وعدہ کیسا ، دیکھنا ، غالب!

نئے فتنوں میں اب چرخِ کُہن کی آزمائش ہے

huzur-e-shah mein ahl-e-sukhan ki azmaish hai

chaman mein khush nawayan-e-chaman ki azmaish hai

qad-o-gesu mein, qais-o-kohkin ki azmaish hai

jahan ham hain, wahan dar-o-rasan ki azmaish hai

karenge kohkin ke hausle ka imtihan akhir

hanoz us khasta ke niro-e-tan ki azmaish hai

nasim-e-misr ko kya pir-e-kanan ki hawa khwahi!

use yusuf ki bu-e-pairahan ki azmaish hai

wo aya bazm mein, dekho, na kahiyo phir ke "ghafil the"

shakeb-o-sabr-e-ahl-e-anjuman ki azmaish hai

rahe dil hi mein tir, achchha, jigar ke par ho, behtar

gharaz shist-e-but-e-nawak fagan ki azmaish hai

nahin kuchh subha-e-o zunnar ke phande mein girai

wafadari mein shaikh-o-barahman ki azmaish hai

para rah, ai dil-e-wabasta! betabi se kya hasil?

magar phir tab-e-zulf-e-purshikan ki azmaish hai

rag-o-pai mein jab utre zahr-e-gham, tab dekhiye kya ho!

abhi to talkhi-e-kam-o-dahan ki azmaish hai

wo awenge mire ghar, waada kaisa, dekhna, ghalib!

nae fitnon mein ab charkh-e-kuhan ki azmaish hai