دیکھ کر در پردہ گرمِ دامن افشانی مجھے

دیکھ کر در پردہ گرمِ دامن افشانی مجھے

کر گئی وابستۂ تن میری عُریانی مجھے

بن گیا تیغِ نگاہِ یار کا سنگِ فَساں

مرحبا مَیں! کیا مبارک ہے گراں جانی مجھے

کیوں نہ ہو بے التفاتی ، اُس کی خاطر جمع ہے

جانتا ہے محوِ پُرسش ہائے پنہانی مجھے

میرے غمخانے کی قسمت جب رقم ہونے لگی

لِکھ دیا منجملۂ اسبابِ ویرانی ، مجھے

بدگماں ہوتا ہے وہ کافر ، نہ ہوتا ، کاشکے!

اِس قدر ذوقِ نوائے مُرغِ بُستانی مجھے

وائے ! واں بھی شورِ محشر نے نہ دَم لینے دیا

لے گیا تھا گور میں ذوقِ تن آسانی مجھے

وعدہ آنے کا وفا کیجے ، یہ کیا انداز ہے ؟

تم نے کیوں سونپی ہے میرے گھر کی دربانی مجھے؟

ہاں نشاطِ آمدِ فصلِ بہاری ، واہ واہ !

پھر ہُوا ہے تازہ سودائے غزل خوانی مجھے

دی مرے بھائی کو حق نے از سرِ نَو زندگی

میرزا یوسف ہے ، غالب ! یوسفِ ثانی مجھے

dekh kar dar parda garm-e-daman afshani mujhe

kar gai wabasta-e-tan meri uryani mujhe

ban gaya tegh-e-nigah-e-yar ka sang-e-fasan

marhaba main! kya mubarak hai giran jani mujhe

kyun na ho be iltifati, us ki khatir jama hai

janta hai mahw-e-pursish ha-e-pinhani mujhe

mere ghamkhane ki qismat jab raqam hone lagi

likh diya minjumla-e-asbab-e-wirani, mujhe

badguman hota hai wo kafir, na hota, kashke!

is qadar zauq-e-nawa-e-murgh-e-bustani mujhe

wae! wan bhi shor-e-mahshar ne na dam lene diya

le gaya tha gor mein zauq-e-tan asani mujhe

waada ane ka wafa kije, ye kya andaz hai?

tum ne kyun saunpi hai mere ghar ki darbani mujhe?

han nishat-e-amad-e-fasl-e-bahari, wah wah!

phir hua hai taza sauda-e-ghazal khwani mujhe

di mire bhai ko haq ne az sar-e-nau zindagi

mirza-e-yusuf hai, ghalib! yusuf-e-sani mujhe