غیر لیں محفل میں بوسے جام کے

غیر لیں محفل میں بوسے جام کے

ہم رہیں یوں تشنہ لب پیغام کے

خستگی کا تم سے کیا شکوہ کہ یہ

ہتھکنڈے ہیں چرخِ نیلی فام کے

خط لکھیں گے گرچہ مطلب کچھ نہ ہو

ہم تو عاشق ہیں تمہارے نام کے

رات پی زمزم پہ مے اور صبح دم

دھوئے دھبّے جامۂ احرام کے

دل کو آنکھوں نے پھنسایا کیا مگر

یہ بھی حلقے ہیں تمہارے دام کے

شاہ کی ہے غسلِ صحّت کی خبر

دیکھیے کب دن پھریں حمّام کے

عشق نے غالب نکمّا کر دیا

ورنہ ہم بھی آدمی تھے کام کے

ghair len mahfil mein bose jam ke

ham rahen yun tishna lab paigham ke

khastagi ka tum se kya shikwa ke ye

hathkande hain charkh-e-nili fam ke

khat likhenge garche matlab kuchh na ho

ham to ashiq hain tumhare nam ke

rat pi zamzam pe mai aur subh dam

dhoe dhabbe jama-e-ehram ke

dil ko ankhon ne phansaya kya magar

ye bhi halqe hain tumhare dam ke

shah ki hai ghusl-e-sehhat ki khabar

dekhiye kab din phiren hammam ke

ishq ne ghalib nikamma kar diya

warna ham bhi admi the kam ke