عجب نشاط سے جلاّد کے چلے ہیں ہم آگے

عجب نشاط سے جلاّد کے چلے ہیں ہم آگے

کہ اپنے سائے سے سر پاؤں سے ہے دو قدم آگے

قضا نے تھا مجھے چاہا خرابِ بادۂ الفت

فقط خراب لکھا، بس نہ چل سکا قلم آگے

غمِ زمانہ نے جھاڑی نشاطِ عشق کی مستی

وگرنہ ہم بھی اٹھاتے تھے لذّتِ الم آگے

خدا کے واسطے داد اس جنونِ شوق کی دینا

کہ اس کے در پہ پہنچتے ہیں نامہ بر سے ہم آگے

یہ عمر بھر جو پریشانیاں اٹھائی ہیں ہم نے

تمہارے آئیو اے طرّہ‌ ہاۓ خم بہ خم آگے

دل و جگر میں پَر افشاں جو ایک موجۂ خوں ہے

ہم اپنے زعم میں سمجھے ہوئے تھے اس کو دم آگے

قسم جنازے پہ آنے کی میرے کھاتے ہیں غالب

ہمیشہ کھاتے تھے جو میری جان کی قسم آگے

ajab nishat se jallad ke chale hain ham age

ke apne sae se sar paon se hai do qadam age

qaza ne tha mujhe chaha kharab-e-bada-e-ulfat

faqat kharab likha, bas na chal saka qalam age

gham-e-zamana ne jhari nishat-e-ishq ki masti

wagarna ham bhi uthate the lazzat-e-alam age

khuda ke waste dad is junun-e-shauq ki dena

ke us ke dar pe pahunchte hain nama bar se ham age

ye umr bhar jo pareshaniyan uthai hain ham ne

tumhare ayu ai turra ha-e-kham ba kham age

dil-o-jigar mein par afshan jo ek mauja-e-khun hai

ham apne zaam mein samjhe hue the us ko dam age

qasam janaze pe ane ki mere khate hain ghalib

hamesha khate the jo meri jan ki qasam age