تسکیں کو ہم نہ روئیں جو ذوقِ نظر ملے

تسکیں کو ہم نہ روئیں جو ذوقِ نظر ملے

حورانِ خلد میں تری صورت مگر ملے

اپنی گلی میں مجھ کو نہ کر دفن بعدِ قتل

میرے پتے سے خلق کو کیوں تیرا گھر ملے

ساقی گری کی شرم کرو آج، ورنہ ہم

ہر شب پیا ہی کرتے ہیں مے جس قدر ملے

تجھ سے تو کچھ کلام نہیں لیکن اے ندیم

میرا سلام کہیو اگر نامہ بر ملے

تم کو بھی ہم دکھائیں کہ مجنوں نے کیا کِیا

فرصت کشاکشِ غمِ پنہاں سے گر ملے

لازم نہیں کہ خضر کی ہم پیروی کریں

جانا کہ اک بزرگ ہمیں ہم سفر ملے

اے ساکنانِ کوچۂ دل دار دیکھنا

تم کو کہیں جو غالب آشفتہ سر ملے

taskin ko ham na roen jo zauq-e-nazar mile

huran-e-khuld mein tiri surat magar mile

apni gali mein mujh ko na kar dafn baad-e-qatl

mere patte se khalq ko kyun tera ghar mile

saqi giri ki sharm karo aj, warna ham

har shab piya hi karte hain mai jis qadar mile

tujh se to kuchh kalam nahin lekin ai nadim

mera salam kahiyo agar nama bar mile

tum ko bhi ham dikhaen ke majnun ne kya kiya

fursat kashakash-e-gham-e-pinhan se gar mile

lazim nahin ke khizr ki ham pairawi karen

jana ke ik buzurg hamen ham safar mile

ai sakinan-e-kucha-e-dil dar dekhna

tum ko kahin jo ghalib-e-ashufta sar mile