مسجد کے زیرِ سایہ خرابات چاہیے

مسجد کے زیرِ سایہ خرابات چاہیے

بھَوں پاس آنکھ قبلۂ حاجات چاہیے

عاشق ہوئے ہیں آپ بھی ایک اور شخص پر

آخر ستم کی کچھ تو مکافات چاہیے

دے داد اے فلک! دلِ حسرت پرست کی

ہاں کچھ نہ کچھ تلافیِ مافات چاہیے

سیکھے ہیں مہ رخوں کے لیے ہم مصوّری

تقریب کچھ تو بہرِ ملاقات چاہیے

مے سے غرض نشاط ہے کس رو سیاہ کو

اک گونہ بیخودی مجھے دن رات چاہیے

ہے رنگِ لالہ و گل و نسریں جدا جدا

ہر رنگ میں بہار کا اثبات چاہیے

سر پاۓ خم پہ چاہیے ہنگامِ بے خودی

رو سوۓ قبلہ وقتِ مناجات چاہیے

یعنی بہ حسبِ گردشِ پیمانۂ صفات

عارف ہمیشہ مستِ مئے ذات چاہیے

نشو و نما ہے اصل سے غالب فروع کو

خاموشی ہی سے نکلے ہے جو بات چاہیے

masjid ke zer-e-saya kharabat chahiye

bhaun pas ankh qibla-e-hajat chahiye

ashiq hue hain ap bhi ek aur shakhs par

akhir sitam ki kuchh to mukafat chahiye

de dad ai falak! dil-e-hasrat parast ki

han kuchh na kuchh talafi-e-mafat chahiye

sikhe hain mah rukhon ke liye ham musawwiri

taqrib kuchh to bahr-e-mulaqat chahiye

mai se gharaz nishat hai kis ro siyah ko

ik guna bekhudi mujhe din rat chahiye

hai rang-e-lala-o-gul-o-nasrain juda juda

har rang mein bahar ka isbat chahiye

sar pae kham pe chahiye hangam-e-be khudi

ro su-e-qibla waqt-e-munajat chahiye

yaani ba hasb-e-gardish-e-paimana-e-sifat

arif hamesha mast-e-mai-e-zat chahiye

nashw-o-numa hai asl se ghalib faro ko

khamoshi hi se nikle hai jo bat chahiye