اپنا احوالِ دلِ زار کہوں یا نہ کہوں

اپنا احوالِ دلِ زار کہوں یا نہ کہوں

ہے حیا مانعِ اظہار۔ کہوں یا نہ کہوں

نہیں کرنے کا میں تقریر ادب سے باہر

میں بھی ہوں واقفِ اسرار ۔کہوں یا نہ کہوں

شکوہ سمجھو اسے یا کوئی شکایت سمجھو

اپنی ہستی سے ہوں بیزار۔ کہوں یا نہ کہوں

اپنے دل ہی سے میں احوالِ گرفتارئِ دل

جب نہ پاؤں کوئی غم خوار کہوں یا نہ کہوں

دل کے ہاتھوں سے، کہ ہے دشمنِ جانی اپنا

ہوں اک آفت میں گرفتار ۔کہوں یا نہ کہوں

میں تو دیوانہ ہوں اور ایک جہاں ہے غمّاز

گوش ہیں در پسِ دیوار کہوں یا نہ کہوں

آپ سے وہ مرا احوال نہ پوچھے تو اسد

حسبِ حال اپنے پھر اشعار کہوں یا نہ کہوں

apna ahwal-e-dil-e-zar kahun ya na kahun

hai haya mane-e-izhar. kahun ya na kahun

nahin karne ka main taqrir adab se bahar

main bhi hun waqif-e-asrar.kahun ya na kahun

shikwa samjho use ya koi shikayat samjho

apni hasti se hun bezar. kahun ya na kahun

apne dil hi se main ahwal-e-garfatar-e-dil

jab na paon koi gham khwar kahun ya na kahun

dil ke hathon se, ke hai dushman-e-jani apna

hun ik afat mein giraftar.kahun ya na kahun

main to diwana hun aur ek jahan hai ghammaz

gosh hain dar pas-e-diwar kahun ya na kahun

ap se wo mira ahwal na puchhe to asad

hasb-e-hal apne phir ashar kahun ya na kahun