مزے جہان کے اپنی نظر میں خاک نہیں

مزے جہان کے اپنی نظر میں خاک نہیں

سوائے خونِ جگر، سو جگر میں خاک نہیں

مگر غبار ہُوے پر ہَوا اُڑا لے جائے

وگرنہ تاب و تواں بال و پر میں خاک نہیں

یہ کس بہشت شمائل کی آمد آمد ہے؟

کہ غیرِ جلوۂ گُل رہ گزر میں خاک نہیں

بھلا اُسے نہ سہی، کچھ مجھی کو رحم آتا

اثر مرے نفسِ بے اثر میں خاک نہیں

خیالِ جلوۂ گُل سے خراب ہیں میکش

شراب خانے کے دیوار و در میں خاک نہیں

ہُوا ہوں عشق کی غارت گری سے شرمندہ

سوائے حسرتِ تعمیر۔ گھر میں خاک نہیں

ہمارے شعر ہیں اب صرف دل لگی کے اسد

کُھلا، کہ فائدہ عرضِ ہُنر میں خاک نہیں

maze jahan ke apni nazar mein khak nahin

siwae khun-e-jigar, so jigar mein khak nahin

magar ghubar huwe par hawa ura le jae

wagarna tab-o-tawan bal-o-par main khak nahin

ye kis bahisht shamail ki amad amad hai?

ke ghair-e-jalwa-e-gul rah guzar mein khak nahin

bhala use na sahi, kuchh mujhi ko rahm ata

asar mire nafas-e-be asar mein khak nahin

khayal-e-jalwa-e-gul se kharab hain maikash

sharab khane ke diwar-o-dar mein khak nahin

hua hun ishq ki gharat giri se sharminda

siwae hasrat-e-taamir. ghar mein khak nahin

hamare sher hain ab sirf-e-dil lagi ke asad

khula, ke faida arz-e-hunar mein khak nahin