دائم پڑا ہُوا ترے در پر نہیں ہُوں میں

دائم پڑا ہُوا ترے در پر نہیں ہُوں میں

خاک ایسی زندگی پہ کہ پتھر نہیں ہُوں میں

کیوں گردشِ مدام سے گبھرا نہ جائے دل

انسان ہوں پیالہ و ساغر نہیں ہُوں میں

یا رب، زمانہ مجھ کو مٹاتا ہے کس لیے؟

لوحِ جہاں پہ حرفِ مکرّر نہیں ہُوں میں

حد چاہیے سزا میں عقوبت کے واسطے

آخر گناہگار ہُوں کافَر نہیں ہُوں میں

کس واسطے عزیز نہیں جانتے مجھے؟

لعل و زمرّد و زر و گوھر نہیں ہُوں میں

رکھتے ہو تم قدم مری آنکھوں سے کیوں دریغ؟

رتبے میں مہر و ماہ سے کمتر نہیں ہُوں میں؟

کرتے ہو مجھ کو منعِ قدم بوس کس لیے؟

کیا آسمان کے بھی برابر نہیں ہُوں میں؟

غالب وظیفہ خوار ہو دو شاہ کو دعا

وہ دن گئے کہ کہتے تھے نوکر نہیں ہُوں میں

daim para hua tire dar par nahin hun main

khak aisi zindagi pe ke patthar nahin hun main

kyun gardish-e-mudam se gabhra na jae dil

insan hun pyala-o-saghar nahin hun main

ya rab, zamana mujh ko mitata hai kis liye?

lauh-e-jahan pe harf-e-mukarrar nahin hun main

had chahiye saza mein uqubat ke waste

akhir gunahgar hun kafar nahin hun main

kis waste aziz nahin jante mujhe?

laal-o-zamurrad-o-zar-o-gauhar nahin hun main

rakhte ho tum qadam miri ankhon se kyun daregh?

rutbe mein mehr-o-mah se kamtar nahin hun main?

karte ho mujh ko man-e-qadam bos kis liye?

kya asman ke bhi barabar nahin hun main?

ghalib wazifa khwar ho do shah ko dua

wo din gae ke kahte the naukar nahin hun main