حیراں ہوں، دل کو روؤں کہ پیٹوں جگر کو مَیں

حیراں ہوں، دل کو روؤں کہ پیٹوں جگر کو مَیں

مقدور ہو تو ساتھ رکھوں نوحہ گر کو مَیں

چھوڑا نہ رشک نے کہ ترے گھر کا نام لوں

ہر اک سے پُو چھتا ہوں کہ “ جاؤں کدھر کو مَیں“

جانا پڑا رقیب کے در پر ہزار بار

اے کاش جانتا نہ تری رہ گزر کو مَیں

ہے کیا، جو کس کے باندھیے میری بلا ڈرے

کیا جانتا نہیں ہُوں تمھاری کمر کو مَیں

لو، وہ بھی کہ رہے ہیں کہ بے ننگ و نام ہے‘

یہ جانتا اگر، تو لُٹاتا نہ گھر کو مَیں

چلتا ہوں تھوڑی دُور ہر اک تیز رَو کے ساتھ

پہچانتا نہیں ہُوں ابھی راہبر کو مَیں

خواہش کو احمقوں نے پرستش دیا قرار

کیا پُوجتا ہوں اس بُتِ بیداد گر کو مَیں

پھر بے خودی میں بھول گیا راہِ کوئے یار

جاتا وگرنہ ایک دن اپنی خبر کو مَیں

اپنے پہ کر رہا ہُوں قیاس اہلِ دہر کا

سمجھا ہوں دل پذیر متاعِ ہُنر کو میں

غالب خدا کرے کہ سوارِ سمندِ ناز

دیکھوں علی بہادرِ عالی گُہر کو مَیں

hairan hun, dil ko roun ke pitun jigar ko main

maqdur ho to sath rakhun nauha gar ko main

chhora na rashk ne ke tire ghar ka nam lun

har ik se pu chhanta hun ke " jaun kidhar ko main"

jana para raqib ke dar par hazar bar

ai kash janta na tiri rah guzar ko main

hai kya, jo kis ke bandhiye meri bala dare

kya janta nahin hun tumhari kamar ko main

lo, wo bhi ke rahe hain ke be nang-o-nam hai'

ye janta agar, to lutata na ghar ko main

chalta hun thori dur har ik tez rau ke sath

pahchanta nahin hun abhi rahbar ko main

khwahish ko ahmaqon ne parastish diya qarar

kya pujta hun us but-e-bedad gar ko main

phir be khudi mein bhul gaya rah-e-ku-e-yar

jata wagarna ek din apni khabar ko main

apne pe kar raha hun qayas ahl-e-dahr ka

samjha hun dil pazir mata-e-hunar ko main

ghalib khuda kare ke sawar-e-samand-e-naz

dekhun ali bahadur-e-ali guhar ko main