ہم سے کھل جاؤ بوقتِ مے پرستی ایک دن

ہم سے کھل جاؤ بوقتِ مے پرستی ایک دن

ورنہ ہم چھیڑیں گے رکھ کر عُذرِ مستی ایک دن

غرّۂِ اوجِ بِنائے عالمِ امکاں نہ ہو

اِس بلندی کے نصیبوں میں ہے پستی ایک دن

قرض کی پیتے تھے مے لیکن سمجھتے تھے کہ ہاں

رنگ لائے گی ہماری فاقہ مستی ایک دن

نغمہ ہائے غم کو ہی اے دل غنیمت جانیے

بے صدا ہو جائے گا یہ سازِ ہستی ایک دن

دَھول دَھپّا اُس سراپا ناز کا شیوہ نہیں

ہم ہی کر بیٹھے تھے غالب پیش دستی ایک دن

ham se khul jao boqat-e-mai parasti ek din

warna ham chherenge rakh kar uzr-e-masti ek din

ghara-e-auj-e-binae alam-e-imkan na ho

is bulandi ke nasibon mein hai pasti ek din

qarz ki pite the mai lekin samajhte the ke han

rang laegi hamari faqa masti ek din

naghma ha-e-gham ko hi ai dil ghanimat janiye

be sada ho jaega ye saz-e-hasti ek din

dhaul dhappa us sarapa naz ka shewa nahin

ham hi kar baithe the ghalib pesh dasti ek din