رُخِ نگار سے ہے سوزِ جاودانیِ شمع

رُخِ نگار سے ہے سوزِ جاودانیِ شمع

ہوئی ہے آتشِ گُل آبِ زندگانیِ شمع

زبانِ اہلِ زباں میں ہے مرگِ خاموشی

یہ بات بزم میں روشن ہوئی زبانیِ شمع

کرے ہے صِرف بہ ایمائے شعلہ قصہ تمام

بہ طرزِ اہلِ فنا ہے فسانہ خوانیِ شمع

غم اُس کو حسرتِ پروانہ کا ہے اے شعلہ

ترے لرزنے سے ظاہر ہے ناتوانیِ شمع

ترے خیال سے رُوح اہتزاز کرتی ہے

بہ جلوہ ریزئ باد و بہ پرفشانیِ شمع

نشاطِ داغِ غمِ عشق کی بہار نہ پُوچھ

شگفتگی ہے شہیدِ گُلِ خزانیِ شمع

جلے ہے ، دیکھ کے بالینِ یار پر مجھ کو

نہ کیوں ہو دل پہ مرے داغِ بدگمانیِ شمع

rukh-e-nigar se hai soz-e-jawidani-e-shama

hui hai atish-e-gul ab-e-zindagani-e-shama

zaban-e-ahl-e-zaban mein hai marg-e-khamoshi

ye bat bazm mein raushan hui zabani-e-shama

kare hai sirf ba ima-e-shola qissa tamam

ba tarz-e-ahl-e-fana hai fasana khwani-e-shama

gham us ko hasrat-e-parwana ka hai ai shola

tire larazne se zahir hai natawani-e-shama

tire khayal se ruh ehtizaz karti hai

ba jalwa rezi-e-bad-o-ba purfishani-e-shama

nishat-e-dagh-e-gham-e-ishq ki bahar na puchh

shaguftagi hai shahid-e-gul-e-khuzzani-e-shama

jale hai, dekh ke balen-e-yar par mujh ko

na kyun ho dil pe mire dagh-e-badgumani-e-shama