گھر جب بنا لیا ترے در پر کہے بغیر

گھر جب بنا لیا ترے در پر کہے بغیر

جانے گا اب بھی تو نہ مرا گھر کہے بغیر؟

کہتے ہیں جب رہی نہ مجھے طاقتِ سخن

’جانوں کسی کے دل کی میں کیونکر کہے بغیر‘

کام اس سے آ پڑا ہے کہ جس کا جہان میں

لیوے نہ کوئی نام ستم گر کہے بغیر

جی میں ہی کچھ نہیں ہے ہمارے وگرنہ ہم

سر جاۓ یا رہے، نہ رہیں پر کہے بغیر

چھوڑوں گا میں نہ اس بتِ کافر کا پوجنا

چھوڑے نہ خلق گو مجھے کافَر کہے بغیر

مقصد ہے ناز و غمزہ ولے گفتگو میں کام

چلتا نہیں ہے دُشنہ و خنجر کہے بغیر

ہر چند ہو مشاہدۂ حق کی گفتگو

بنتی نہیں ہے بادہ و ساغر کہے بغیر

بہرا ہوں میں۔ تو چاہیۓ، دونا ہوں التفات

سنتا نہیں ہوں بات مکرّر کہے بغیر

غالب نہ کر حضور میں تو بار بار عرض

ظاہر ہے تیرا حال سب اُن پر کہے بغیر

ghar jab bana liya tire dar par kahe baghair

janega ab bhi to na mira ghar kahe baghair?

kahte hain jab rahi na mujhe taqat-e-sukhan

'janun kisi ke dil ki main kyunkar kahe baghair'

kam us se a para hai ke jis ka jahan mein

lewe na koi nam sitam gar kahe baghair

ji mein hi kuchh nahin hai hamare wagarna ham

sar jae ya rahe, na rahen par kahe baghair

chhorunga mein na us but-e-kafir ka pujna

chhore na khalq go mujhe kafar kahe baghair

maqsad hai naz-o-ghamza wale guftugu mein kam

chalta nahin hai dashna-o-khanjar kahe baghair

har chand ho mushahada-e-haq ki guftugu

banti nahin hai bada-o-saghar kahe baghair

bahra hun main. to chahiye, duna hun iltifat

sunta nahin hun bat mukarrar kahe baghair

ghalib na kar huzur mein to bar bar arz

zahir hai tera hal sab un par kahe baghair