جور سے باز آئے پر باز آئیں کیا

جور سے باز آئے پر باز آئیں کیا

کہتے ہیں ہم تجھ کو منہ دکھلائیں کیا

رات دن گردش میں ہیں سات آسماں

ہو رہے گا کچھ نہ کچھ گھبرائیں کیا

لاگ ہو تو اس کو ہم سمجھیں لگاؤ

جب نہ ہو کچھ بھی تو دھوکا کھائیں کیا

ہو لیے کیوں نامہ بر کے ساتھ ساتھ

یا رب اپنے خط کو ہم پہنچائیں کیا

موجِ خوں سر سے گزر ہی کیوں نہ جائے

آستانِ یار سے اٹھ جائیں کیا

عمر بھر دیکھا کیے مرنے کی راہ

مر گیے پر دیکھیے دکھلائیں کیا

پوچھتے ہیں وہ کہ غالبؔ کون ہے

کوئی بتلاؤ کہ ہم بتلائیں کیا

jaur se baz ae par baz aen kya

kahte hain ham tujh ko munh dikhlaen kya

rat din gardish mein hain sat asman

ho rahega kuchh na kuchh ghabraen kya

lag ho to us ko ham samjhen lagao

jab na ho kuchh bhi to dhoka khaen kya

ho liye kyun nama bar ke sath sath

ya rab apne khat ko ham pahunchaen kya

mauj-e-khun sar se guzar hi kyun na jae

astan-e-yar se uth jaen kya

umr bhar dekha kiye marne ki rah

mar gaye par dekhiye dikhlaen kya

puchhte hain wo ke ghalib kaun hai

koi batlao ke ham batlaen kya