بسکہ دشوار ہے ہر کام کا آساں ہونا

بسکہ دشوار ہے ہر کام کا آساں ہونا

آدمی کو بھی میسر نہیں انساں ہونا

گریہ چاہے ہے خرابی مرے کاشانے کی

در و دیوار سے ٹپکے ہے بیاباں ہونا

واۓ دیوانگئ شوق کہ ہر دم مجھ کو

آپ جانا اُدھر اور آپ ہی حیراں ہونا

جلوہ از بسکہ تقاضائے نگہ کرتا ہے

جوہرِ آئینہ بھی چاہے ہے مژگاں ہونا

عشرتِ قتل گہِ اہل تمنا، مت پوچھ

عیدِ نظّارہ ہے شمشیر کا عریاں ہونا

لے گئے خاک میں ہم داغِ تمنائے نشاط

تو ہو اور آپ بہ صد رنگِ گلستاں ہونا

عشرتِ پارۂ دل، زخمِ تمنا کھانا

لذت ریشِ جگر، غرقِ نمکداں ہونا

کی مرے قتل کے بعد اس نے جفا سے توبہ

ہائے اس زود پشیماں کا پشیماں ہونا

حیف اُس چار گرہ کپڑے کی قسمت غالبؔ!

جس کی قسمت میں ہو عاشق کا گریباں ہونا

baske dushwar hai har kam ka asan hona

admi ko bhi muyassar nahin insan hona

girya chahe hai kharabi mire kashane ki

dar-o-diwar se tapke hai bayaban hona

wae diwangi-e-shauq ke har dam mujh ko

ap jana idhar aur ap hi hairan hona

jalwa az baske taqaza-e-nigah karta hai

jauhar-e-aina bhi chahe hai mizhgan hona

ishrat-e-qatl gah-e-ahl-e-tamanna, mat puchh

eid-e-nazzara hai shamshir ka uryan hona

le gae khak mein ham dagh-e-tamanna-e-nishat

to ho aur ap ba sad rang-e-gulistan hona

ishrat-e-para-e-dil, zakhm-e-tamanna khana

lazzat-e-rish-e-jigar, gharq-e-namakdan hona

ki mire qatl ke baad us ne jafa se tauba

hae is zud pasheman ka pasheman hona

haif us char girah kapre ki qismat ghalib!

jis ki qismat mein ho ashiq ka gareban hona