دیکھا نہ ہم نے رشک سے اغیار کی طرف

دیکھا نہ ہم نے رشک سے اغیار کی طرف

منہ پھیر بیٹھے بزم میں دیوار کی طرف

سیل سرشک اپنے ہی گھر میں بہائیں گے

کیوں جائے یہ بلا تری دیوار کی طرف

بیٹھے بٹھائے آئے جو شامت تو کیا علاج

دل نے کہا کہ آؤ چلیں یار کی طرف

چاہی تھی داد ہم نے دل صاف کی مگر

آئینہ ہو گیا ترے رخسار کی طرف

تصویر کو بھی اس کی یہاں تک غرور ہے

دیکھے کبھی نہ طالب دیدار کی طرف

تقصیر مے فروش کی اے محتسب نہیں

یہ چیز اڑ کے جاتی ہے مے خوار کی طرف

دی جان کس خوشی سے تہ تیغ داغؔ نے

لب پر تبسم اور نظر یار کی طرف

dekha na ham ne rashk se aghyar ki taraf

munh pher baithe bazm mein diwar ki taraf

sail-e-sarishk apne hi ghar mein bahaenge

kyun jae ye bala tiri diwar ki taraf

baithe bithae ae jo shamat to kya ilaj

dil ne kaha ke ao chalen yar ki taraf

chahi thi dad ham ne dil saf ki magar

aina ho gaya tire rukhsar ki taraf

taswir ko bhi us ki yahan tak ghurur hai

dekhe kabhi na talib-e-didar ki taraf

taqsir mai farosh ki ai mohtasib nahin

ye chiz ur ke jati hai mai khwar ki taraf

di jan kis khushi se tah-e-tegh dagh ne

lab par tabassum aur nazar yar ki taraf