دیکھی دل دے کے قدر دانی

دیکھی دل دے کے قدر دانی

بس بندہ نواز مہربانی

ہونی ہے باز پرس اعمال

کہنی ہے بہت بڑی کہانی

شعلے اٹھتے ہیں استخواں سے

اللہ رے سوزش نہانی

سونا ہے گوشہ لحد میں

ہاں ہاں وہ رات بھی ہے آنی

او وعدہ خلاف سالہا سال

آنکھوں نے کی ہے پاسبانی

آئی پیری پیام رخصت

بڑھتی جاتی ہے ناتوانی

مستانہ سری نسیمؔ کب تک

آخر آخر ہے نوجوانی

dekhi dil de ke qadr dani

bas banda nawaz mehrbani

honi hai baz pars aamal

kahni hai bahut bari kahani

shole uthte hain ustukhwan se

allah re sozish-e-nihani

sona hai gosha lahad mein

han han wo rat bhi hai ani

o waada khilaf salha sal

ankhon ne ki hai pasbani

ai piri payam-e-rukhsat

barhti jati hai natawani

mastana siri nasim kab tak

akhir akhir hai naujawani