دیکھنا بھی تو انہیں دور سے دیکھا کرنا

دیکھنا بھی تو انہیں دور سے دیکھا کرنا

شیوۂ عشق نہیں حسن کو رسوا کرنا

اک نظر بھی تری کافی تھی پئے راحت جاں

کچھ بھی دشوار نہ تھا مجھ کو شکیبا کرنا

ان کو یاں وعدے پہ آ لینے دے اے ابر بہار

جس قدر چاہنا پھر بعد میں برسا کرنا

شام ہو یا کہ سحر یاد انہیں کی رکھنی

دن ہو یا رات ہمیں ذکر انہیں کا کرنا

صوم زاہد کو مبارک رہے عابد کو صلوٰۃ

عاصیوں کو تری رحمت پہ بھروسا کرنا

عاشقو حسن جفاکار کا شکوہ ہے گناہ

تم خبردار خبردار نہ ایسا کرنا

کچھ سمجھ میں نہیں آتا کہ یہ کیا ہے حسرتؔ

ان سے مل کر بھی نہ اظہار تمنا کرنا

dekhna bhi to unhen dur se dekha karna

shewa-e-ishq nahin husn ko ruswa karna

ik nazar bhi tiri kafi thi piye rahat-e-jan

kuchh bhi dushwar na tha mujh ko shakeba karna

un ko yan waade pe a lene de ai abr-e-bahar

jis qadar chahna phir baad mein barsa karna

sham ho ya ke sahar yad unhen ki rakhni

din ho ya rat hamen zikr unhen ka karna

saum zahid ko mubarak rahe abid ko salwat

asiyon ko tiri rahmat pe bharosa karna

ashiqo husn jafakar ka shikwa hai gunah

tum khabardar khabardar na aisa karna

kuchh samajh mein nahin ata ke ye kya hai hasrat

un se mil kar bhi na izhar-e-tamanna karna