دیکھوں ہوں یوں میں اس ستم ایجاد کی طرف

دیکھوں ہوں یوں میں اس ستم ایجاد کی طرف

جوں صید وقت ذبح کے صیاد کی طرف

نے دانہ ہم قیاس کیا نے لحاظ دام

دھنس گئے قفس میں دیکھ کے صیاد کی طرف

ثابت نہ ہووے خون مرا روز باز پرس

بولیں گے اہل حشر سو جلاد کی طرف

پتھر کی لیکھ تھا سخن اس کا ہزار حیف

بولی زبان تیشہ نہ فرہاد کی طرف

طرہ کے تیرے واسطے صد چوب شانہ دار

قمری گئی ہے کاٹنے شمشاد کی طرف

سوداؔ تو اس غزل کو غزل در غزل ہی کہہ

ہونا ہے تجھ کو میرؔ سے استاد کی طرف

dekhun hun yun main us sitam ijad ki taraf

jun said waqt-e-zabh ke sayyad ki taraf

ne dana ham qayas kiya ne lihaz dam

dhans gae qafas mein dekh ke sayyad ki taraf

sabit na howe khun mira roz-e-baz pars

bolenge ahl-e-hashr so jallad ki taraf

patthar ki lekh tha sukhan us ka hazar haif

boli zaban-e-tesha na farhad ki taraf

turra ke tere waste sad chob shana dar

qumri gai hai katne shamshad ki taraf

sauda to is ghazal ko ghazal dar ghazal hi kah

hona hai tujh ko mir se ustad ki taraf