دنیا میں ہوں دنیا کا طلب گار نہیں ہوں

دنیا میں ہوں دنیا کا طلب گار نہیں ہوں

بازار سے گزرا ہوں خریدار نہیں ہوں

زندہ ہوں مگر زیست کی لذت نہیں باقی

ہر چند کہ ہوں ہوش میں ہشیار نہیں ہوں

اس خانۂ ہستی سے گزر جاؤں گا بے لوث

سایہ ہوں فقط نقش بہ دیوار نہیں ہوں

افسردہ ہوں عبرت سے دوا کی نہیں حاجت

غم کا مجھے یہ ضعف ہے بیمار نہیں ہوں

وہ گل ہوں خزاں نے جسے برباد کیا ہے

الجھوں کسی دامن سے میں وہ خار نہیں ہوں

یا رب مجھے محفوظ رکھ اس بت کے ستم سے

میں اس کی عنایت کا طلب گار نہیں ہوں

گو دعوی تقوی نہیں درگاہ خدا میں

بت جس سے ہوں خوش ایسا گنہ گار نہیں ہوں

افسردگی و ضعف کی کچھ حد نہیں اکبرؔ

کافر کے مقابل میں بھی دیں دار نہیں ہوں

duniya mein hun duniya ka talab gar nahin hun

bazar se guzra hun kharidar nahin hun

zinda hun magar zist ki lazzat nahin baqi

har chand ke hun hosh mein hushyar nahin hun

is khana-e-hasti se guzar jaunga be los

saya hun faqat naqsh ba diwar nahin hun

afsurda hun ibrat se dawa ki nahin hajat

gham ka mujhe ye zof hai bimar nahin hun

wo gul hun khizan ne jise barbad kiya hai

uljhun kisi daman se main wo khar nahin hun

ya rab mujhe mahfuz rakh us but ke sitam se

main us ki inayat ka talab gar nahin hun

go daawa-e-taqwa nahin dargah-e-khuda mein

but jis se hun khush aisa gunah gar nahin hun

afsurdagi-o-zof ki kuchh had nahin akbar

kafir ke muqabil mein bhi den dar nahin hun